Ashutushi chi aluwataaikai Asiria saaʼu tü poloosükat eʼirukuu chajatkat Israel. Ashuteeshi joo nia saaʼu tü pueulo chajatkat Judá. Akanajuusü nutuma süpüshuaʼale tü mma chajatkat, shia neʼe choʼujaaka nüpüleerua Jerusalén otta nushutee aaʼu shia. Nnojotpajaʼa nütüjaain saaʼu Senaquerib naaʼinmajüin Jeʼwaa tia pueulokot.

Watta saalii nneerü nuwalaajaka Ezequías nümüin Senaquerib süpüla nnojoluin nushutuin saaʼu Jerusalén. Naʼalainpalashii naya Senaquerib, naapaain tü nneetkat jee nuluwataain na nusurulaatsekana süpüla nashutuin saaʼu Jerusalén. Mmotsü maʼin tü wayuukalüirua natüjaapa saaʼu pejein na asiiriokana. «Nnojo mmoluin jia neema na asiiriokana, nükaaliinjeena waya Jeʼwaa süpüla wakanajüin naya», nümakalaka Ezequías namüin.

Nuluwataain Senaquerib wanee nünüikimaajachi, Rabsaqué münüshi süpüla nimeeʼerainpalain na wayuu chajanakana Jerusalén. Yalajachi shaʼwatüin Rabsaqué anuuipaʼa süʼütpaʼa süsepü Jerusalén. «Nnojoishii süpüla nükaaliinjain jia Jeʼwaa, jalia nimeejayaai jaaʼin Ezequías. Nnojoishi eein wanee maleiwa eekai süpüla naaʼinmajüin jia woulia», nümaka sümaa emetuluin nünüiki.

«¿Kasa anaka süpüla taaʼinrüin?», nümaka Ezequías nümüin Jeʼwaa. Nusoutakalaka Jeʼwaa nümüin: «Nnojo mmoluin pia sutuma nünüiki Rabsaqué. Nnojoleechi ashutuin Senaquerib saaʼu Jerusalén». Suluwataanaka wanee karaloʼuta nümüin Ezequías nutuma Senaquerib, anuu nünüiki suluʼu: «Jaapa shikii tü pueulokot, nnojoleena jia eejiraain wamaa, nnojoleena naaʼinmajüin jia Jeʼwaa». Nuchuntaka Ezequías nümüin Jeʼwaa, müshi nia: «Jeʼwaa, puʼtteʼera waya noulia, sütüjaaiwa saaʼu wayuu süpüshuaʼa piain neʼe chi Maleiwa shiimainshikai». Nusoutaka Jeʼwaa nümüin: «Nnojoleechi ekerotuin chi aluwataashikai saaʼu Asiria suluʼumüin Jerusalén. Taaʼinmajeerü tü tapueulosekat».

Nuʼunakalaka Senaquerib süpüla nushutuin saaʼu Jerusalén. Ashutuinjachia nia naaʼinruʼu saaʼu tia mmakat. Shiasaʼa soʼu wanee ai, nuluwataain Jeʼwaa wanee aapiee süpüla  najaʼttirüinjanain na surulaat asiiriokana. ¡Outushii 185.000 surulaat nutuma wanee aapiee nümaʼanajeejachi Jeʼwaa! Nüleʼejaka Senaquerib nüchikuaʼa nuumainpaʼamüin süka nükanajuuin. Shia naaʼinraka Jeʼwaa tia süpüla nükaaliinjain Ezequías otta süpüla naaʼinmajüin Jerusalén, nikeraajüin Jeʼwaa tü nünüikikat. Pialeje chain Jerusalén, ¿piʼitaainje maʼin paaʼin nünain Jeʼwaa?