Niʼitaain Jehová wanee apain suluʼu wanee mma Edén sünülia. Wainma süsii wunuʼulia, alama otta mürüt suluʼu. Süchikijee nukumajaka chi palajachikai wayuu, Adán nünülia. Nukumajüin nia süka mma otta nujuʼulaka niʼiruʼupünaa. ¿Pütüjaa aaʼu kasain alatüin nümüin? ¡Katüsü noʼu! Nuluwataanaka Adán nutuma Jehová süpüla naaʼinmajüinjatüin tü apainkat sümaa niʼitaainjatüin sünülia süpüshuaʼa tü mürütkalüirua.

Achiaanüshi joo Adán nutuma Jehová. «Anuu süchon tü wunuʼukalüirua süpüshuaʼa süpüla piküinjatüin shia. Nnojoluinjatpajaʼa piküin süchon wanee wunuʼu. Müleka piküle süchon wunuʼukot tüü, outeechi pia», nümaka nümüin.

«Takumajüin paa wanee akaalinjia nia», nümaka Jehová. Nutunkiraka Adán otta niyuʼlaka wanee nuwatse. Nukumajaka Jehová wanee jierü sükajee nuwatse Adán, Eva sünülia. Naya na palajanakana wayuu saaʼu tü Mmakat.  ¿Jamüsü nünüiki Adán wanaa sümaa niʼrüin tü nuʼwayuusekat? «¡Anuu tü jierü nukumajakat Jehová sünainjee tawaʼtse! Müsia aka maʼin taaʼin tayakai», müshi nia sümaa talataa aaʼin.

Nüküjaka Jehová nümüin Adán sümaa Eva kachooinjanain naya süpüla jouluinjatüin wayuu sainküin mmakat süpüshuaʼa. Tü keeʼireekat naaʼin Jehová napüleerua shia talatüinjatüin naaʼin otta anachoinjatüin tü Mmakat natuma. Müinjatü aka saaʼin tü apainkat Edén. Nnojotpajaʼa naaʼinrüin tia. ¿Kasache alataka? Wekirajaajeerü anain tia suluʼu tü wane ekirajaayakat.