Eejachi wanee wayuu Jeremías münüshi jee nünüikimaajachi nia Maleiwa. Nüneeküin nia Jehová süpüla nüküjain pütchi jee nüchiaain na wayuu chajanakana Judá suulia naaʼinrüin kasa mojusü. Anuu nünüiki Jeremías wanaa sümaa nuluwataanüin nutuma Jehová: «Jintüiyüiya maʼin taya, japüleʼe taya sünain aashajawaa suʼupala wayuu». «Nnojo mmoluin pia, takaalinjeechi pia otta taküjeerü pümüin tü püküjainjatkat», nümaka Jehová nümüin.

Nuluwataaka Jehová nia süpüla nuutkajeʼerüin na laülaashii chajanakana suluʼu tia pueulokot otta nusottirüinjatü wanee jaarü noʼupala. Müinjatü nünüiki Jeremías namüin: «Meeria sukuwaʼipa Jerusalén atumawaa». Jashichika maʼin na laülaashiikana saalinjee tia. Niasaʼa wanee sacerdote kanüliakai Pasjur, niʼyaatüin Jeremías; nijittaain najapü otta nuuʼui sünain wanee taapüla. Müliachonsü naaʼin Jeremías, jaʼyuusü naaʼu sümaa jimatachoin nia. Waneemüin kaʼi, nüjütaka Pasjur nüchiki Jeremías. «Müliashi maʼin taya atumawaa, müichia maküjain taya pütchi piantua», nümaka Jeremías. ¿Naaʼinrüinche Jeremías tia? Nnojo. «Tü nünüikikat Jehová müsü aka saaʼin wanee siki chuwatüsü taleʼeruʼu. Nnojoishi süpüla tooʼulaain suulia aküjaa pütchi», müshi nia. Ayatüshi Jeremías sünain aapiraa tü wayuukalüirua.

Sülatapa kojuya juya, aikalaashi wane jekechi aluwataai saaʼu Judá. Jashichishii maʼin na sacerdotekana sutuma tü nüküjakat achiki Jeremías. Akaʼaya na nünüikimaajanayaakana Maleiwa, jashichishii naya. «Anasü woʼutaiwa saaʼin», müshiijeseʼe naya namüin na laülaashiikana. Nümaka Jeremías: «Müleka juʼutule taaʼin, juʼuteechi aaʼin wanee wayuu maainjalasai. Nnojotsü taleʼeruʼujeejatüin tü taküjakat achiki, nünüiki shia Jehová». Naapapa tia na laülaashiikana, «maainjalasai wayuukai chii», müshii naya.

Ayatüshi Jeremías aküjain pütchi. Jashichireeshiʼiya maʼin na laülaashiikana sutuma tia. Otta nachuntuin nümüin  chi aluwataaikai nuʼutunuinjachin aaʼin Jeremías. «Jaaʼinra tü keeʼireekat jaaʼin nüka», nümaka chi aluwataaikai namüin. Nataʼülaka Jeremías jee nojutaka nia suluʼu wanee ishi poopoosü maʼin süpüla outajachin nia. Nimeroto nimeroto nümaka Jeremías shiroku tü pootshikat.

Eejachi wanee wayuu Ébed-Mélec münüshi, aʼyataai nia nümüin chi aluwataaikai. «Na aʼyataakana piʼipajee nojutuin Jeremías suluʼu wanee ishi. Nnojoire wayuʼluin nia yalejee, outeechi nia», nümaka nümüin chi aluwataaikai. Nüjütaka chi aluwataaikai 30 wayuu nümaa Ébed-Mélec süpüla nayuʼluin Jeremías suluʼujee tü ishikat. Ayatüshi aküjain pütchi waneepia chi nünüikimaajachikai Maleiwa mayaainjeʼe müliain nia atumawaa. ¿Aashin püshateein nukuwaʼipa Jeremías?