Sünain shiʼipakat tüü, wekirajaajeerü anain tü Pütchi Ashajuushikat süka Griego, miyoʼuin Jesús naʼaka wayuu nnojoliika washirüin otta nnojoluin miyoʼuin tü mma jemeikalü aluʼu nia. Aʼyataai nia süka taapüla nümaa chi nüshikai. Aneekünüshi Jesús nutuma Jehová süpüla Laülaainjachin nia saaʼu Nuluwataaya, makalaka niain chi Oʼtteʼerüikai wayuu. Kachonle pia, pükaalinja naya nayaawataiwa saaʼu nüneeküin Jehová nüshi otta nii Jesús, wayuuin loto akuwaʼipachii naya otta alin Maleiwa napüla. Naaʼinrüin tia Jehová süpüla anainjatüin nipijia Jesús otta anainjatüin nakuwaʼipa nüpüleerua. Püküja namüin naaʼinmajüin nia Jehová wanaa sümaa nuʼutuneein aaʼin nutuma Herodes. Piiʼiyata namüin nnojoluin eein wanee kasa amalajeʼeraka nünüiki Jehová. Pikiraja naya sünain niain Jehová aneekaka Juan süpüla yapainjatüin nutuma nüpüna Jesús. Püküja namüin na tepichikana kojutushaatain nümüin Jesús tü Nünüikikat Jehová otta oonooshi nia sümaa.