Eejatü wanee majayüt süpüshi Elisabet, María sünülia. Kepiapuʼusü shia suluʼu tü pueulokot Nazaret suluʼu tü mmakat Judea, otta kasaalüinjatü shia nümaa wanee wayuu aʼyataai süka taapüla, José nünülia. Aipiruapa kashi Elisabet sünain ipuoluin, antüshi chi aapieekai Gabriel sünainmüin María. «Jamayaa pia María, eeshi chi Maleiwakai pümaa süka kojutuin maʼin pia nutuma», nümaka sümüin. Nnojotsü shiyaawatüin aaʼu María jamaluʼuluin nünüiki chi aapieekai. «Ipuoleerü pia. Jemeyuleerü pia nümaa wanee joʼuu toolo piʼitaajeechikai anüliain Jesús. Niainjachi wanee aluwataai otta Aluwataainjachi nia süpüla kaʼikat süpüshuaʼa», nümaka Gabriel sümüin.

«¿Jamakuwaʼipat süpüla kachoinjatüin taya sümaa nnojoluin nünainpünaain taya wayuu toolo?», sümaka María. Nusoutaka Gabriel sümüin: «Soto paaʼin nnojoluin kasain isain nüchiki Jehová, nuluwataainjatü tü nüpülainkat süpüla ipuoluinjatüin pia, müsia tü püüʼitkat Elisabet,  aipiruairü kashi shia ipuoluin sümaa maralüin shia paala». Susoutaka María: «Nüchepchia taya Jehová. Anasüjaʼamata sülatüle tamüin tü püküjakalü achiki».

Suʼunaka María eemüin Elisabet, kepiasü Elisabet suluʼu wanee pueulo saaʼusü namünashii. Süntapa María shipialuʼumüin süsaküin shia, wanaa maʼin sümaa tia akutulaashi chi joʼuukai süleʼeruʼu Elisabet. Süntaka tü nüpülainkat Maleiwa saaʼumüin Elisabet. «Anataʼaleesüjaʼa maʼin pukuwaʼipa nutuma Jehová, otta anakuwaʼipat taya süka püntüin tepialuʼumüin, süka piain niin chi Taseñotsekai», sümaka sümüin María. Susoutaka María sümüin: «Taʼwaajüin Jehová süka süpüshuaʼa taaʼin». Makataka shia apünüin kashi shipialuʼu Elisabet. Süleʼejaka mapa Nazaretmüin.

Nütüjaapa saaʼu José ipuoluin María, nnojoishi nia kasaaleein sümaa. Nüntaka wanee aapiee nüʼlapüinruʼu. «Nnojo piyoutuin María süpüla puʼwayuuseinjatüin, nnojotsü aaʼinrüin kasa mojusü», nümakalaka nümüin. Kasaatka José mapa sümaa María.