Süchikijee nüneeküin Jesús 12 aluwataaushii, ashakatüshi nia saaʼujee tü uuchikat otta nuʼunaka eere jutkatüin watta saalii wayuu. Na wayuukana sejena Galileajee, Judeajee, Tirojee, Sidónjee, Siriajee otta na wayuu kepiakana waneemüin saʼata tü süchikat Jordán. Antinnüshii nünainmüin Jesús wayuu eekai ayuulin otta wayuu eekai kaleʼeruʼuin yolujaa, niiyajüin Jesús napüshuaʼa naya wayuukana. Aikalaa müshia nia saaʼu wanee namüna jee nuʼttaka sünain ekirajaa na wayuukana. Nüküjain Jesús namüin tü kasa naaʼinrüinjatkat süpüla naʼaleewainjanain naya Maleiwa. Nayaawatüinjatü aaʼu choʼujaain maʼin Jehová namüin otta alinjachin nia napüla. Müleka shiimainre alin napüla Maleiwa, alinjana napüla na wayuukana. Anamiainjana naya otta lotuinjatü nakuwaʼipa sümüin wayuu süpüshuaʼa, jaʼitakajeʼe namüin na naʼünüükana.

Anuu nünüiki Jesús: «Nnojoishii nayainjanain neʼe alin püpüla na paʼaleewainkana, anashii aire püpüla na püʼünüükana. Jee müleka eere wanee wayuu eekai mojujiraain pümaa, puchuntamaata nümüin süpüla motuin naaʼin paainjala. Anasü müleka paaʼinrüle tü anasükat sümüin wayuu maʼaka pücheküin saaʼinnüin tü anasükat pümüin».

 Anasü maʼin tü nümakat Jesús süchiki sukuwaʼipa wayuu sümaa tü suwashirüinkat. Anuu nünüiki: «Shia anaka aluʼu müleka aleewajiraale waya nümaa Jehová suulia washirüin waya. Eesü süpüla suʼluwajünüin sukorolo wayuu, nnojotpajaʼa süpüla süsütünüin woulia aleewain waya nümaa Jehová. Puuʼulaa suulia shapaain paaʼin saaʼu piküin, saaʼu püsüin jee saaʼu tü kuluulu püsheʼinjatkat. Jülüja paaʼin tü wüchiikalüirua, naapüin chi Maleiwakai namüin tü neküinjatkat. Jaʼitairü shapaain maʼin paaʼin, nnojoleechi pia katüin oʼu wainma juya sünainjee tia. Soto paaʼin nütüjaain saaʼu Jehová tü kasa choʼujaakat pümüin».

Anashaatasü maʼin nikirajia Jesús. Nnojotsü maajüin shikirajia wayuu natuma na fariseokana otta na karaloʼutamaajanakana. ¿Jamüshi nütüjakaʼa maʼin Jesús ekirajaa wayuu? Shia süka shiain nikirajüin anain tü nünüikikat Jehová.