Aʼürülaana anainchi Jesús natuma na fariseokana otta nachajaain sukuwaʼipa süpüla napüreesajirüin nia. Naashin, nnojoishi süpüla niiyajüin Jesús wayuu saawanoʼu. Soʼu wanee kaʼi saawanoʼu, niʼrüin Jesús wanee wayuu moʼupaʼasai sünain ojulijaa kaayeruʼu. «Jalainna jiʼraiwa sünain aneechin wayuukai chii sutuma nüpülain Maleiwa», nümaka Jesús namüin na nikirajüinkana. Nejetaka Jesús mmoluʼu süpüla naainjain wanee pootshi sümaa nushuleʼerüin shia sünain noʼu chi wayuukai. «Puʼuna eemüin tü anuwa oʼoojuleekat kanüliakat Siloam puʼlojooiwa tü poʼukot chamüin», nümaka nümüin. Nuʼunaka chia wayuukai chamüin süpüla nuʼlojooinjatüin tü noʼukot, koʼuka nia nüchikuaʼa.

Ponusü maʼin saaʼin tü wayuukalüirua tü alatakat. «Atak, ¿nnojoishi niain chi moʼusai joyotopuʼukai sünain ojulijaa? Nnojoittaashi niain, mataashi aka naaʼin neʼe», namaka. «Tayaichijaʼaya chi wayuu jemeishikai sümaa moʼuin», nümaka chi wayuukai namüin. Süsakiraka nia tü wayuukalüirua: «¿Jamakuwaʼipai süpüla koʼuinjachin pia?». Nüküjaka tia sümüin tü wayuukalüirua. Nümaanaka joo eemüin na fariseokana süpüla nüküjain tia namüin.

«Nushuleʼerüin Jesús wanee pootshi sünain tü toʼukot jee nüjütüin taya süpüla toʼlojooinjatüin shia. Koʼu müshia taya sutuma taaʼinrüin tü nümakat», nümaka chi wayuukai namüin na fariseokana. «Watüjaaichipa aaʼu Jesús nnojoluin nümaʼanajeejatüin Maleiwa tü nüpülainkat, süka niiyajüin wayuu saawanoʼu», namajiraakalaka na fariseokana. «Müleka nnojorüle nümaʼanajeejatüin Maleiwa tü nüpülainkat, ¿jamakaʼa nuuntaka niiyajüin wayuu ayuuisü?», eeshii eekai namüinña.

Neenajitka na fariseokana nüshi jee nii chi wayuu moʼupuʼukai, nasakiraka  naya: «¿Jamakuwaʼipai süpüla koʼuinjachin nüchikuaʼa chi jüchonkai?». Mmotshii naya seema aküjaa süka naashin na fariseokana, müichiain mekerotuin suluʼumüin tü ekirajüleekat chi eekai kanoulain nünain Jesús. Müsüjeseʼe müin nanüiki mayaa: «Nnojotsü watüjaain saaʼu. Anashi jüsakirüle nia, joʼuule joo nia». Nasakiijüin maʼin na fariseokana chi wayuu moʼupuʼukai. «Taküjüitpaʼasa jümüin tü alatakat tamüin. ¿Jamüshii ayataka jia sünain asakiijaa taya?», nümakalaka neʼipajee. Jashichika na fariseokana nümüin chi wayuu moʼupuʼukai sümaa najünajaain nia namaʼanajee.

Naapapa Jesús süchiki tü aaʼinnakat nüka chi wayuu moʼupuʼukai, nüchajaa achikichi nia. Nüsakiraka nia: «¿Anoujashi pia nünain chi Mesíaskai?». Nusoutaka nümüin Jesús: «¿Jarai nian? Püküja tamüin nüchiki tanoujaiwa nünain». «Taya tayakai chi Mesíaskai», nümaka Jesús nümüin. ¿Aashin anamiain maʼin Jesús nümüin chi wayuu moʼupuʼukai? Koʼushi nia nüchikuaʼa nutuma Jesús otta nükaalinjain nia süpüla kanoulainjachin nia.