Antüshi Jesús yaa mmapaʼamüin süpüla nüküjain pütchi süchiki Nuluwataainjachin Maleiwa. Naapüin Jehová nümüin Jesús tü nüpülainkat süpüla naaʼinrüin kasa pülasü jee süpüla sütüjaanüin aaʼu tü naaʼinrajatkat mapeena nüikalaapa sünain aluwatawaa. Jamüshijaʼa Jesús, nuuntuin niiyajüin wayuu eekai ayuulin. Eepünaale nülatüin, watta saalii wayuu ayuuisü achuntaka kaalinwaa nümüin. Anashii napüshuaʼa nutuma. Jamüshiijaʼa na moʼusaliikana, koʼushii nutuma, na macheʼesaliikana, kacheʼeshii nutuma otta na outakana asaʼa, kasaʼashii nutuma. Jaʼitaina nepettüin sot nüsheʼin Jesús, anashii naya nutuma. Jee nujuʼitirüin yolujaa süleʼeruʼujee wayuu. Watta saalii wayuu anoujakana nünain Jesús, kamaneeshi nia namüin otta nnojoishi nia jashichin namüin, jaʼitaichi mapüsain maʼin nia.

Soʼu wanee kaʼi, antinnüshi nünainmüin Jesús wanee wayuu outa asaʼachi. Süka wainmain wayuu soʼuluʼu tü miichikat, isasü nachiki ekeroloo nünainmüin Jesús na wayuu alüʼüjiraaka chia wayuukai. Naliikajaaka nümaa chi wayuukai chaa süraloʼumüin tü miichikat, naakataka shiʼipa saajuna. Nashakatitka tü süi kaluʼukot chi wayuu outa asaʼachikai. «Tawalachee, püshaʼwalaa jee puwaraʼiraa maa», nümaka Jesús nümüin. Wanaa sümaa nuwarairaain chi wayuukai, ponusü maʼin saaʼin tü wayuukalüirua.

Soʼu wanee kaʼi, nülüʼütpa Jesús süpüla nüntüin suluʼumüin wanee pueulo, eejana nüpüla polooshii wayuu ajaʼttaa atachii. Shaʼwashawatshii kaʼyata nuulia. «Jesús, piiyaja maa waya», namaka sümaa emetuluin nanüiki. Soʼu tia, nnojoishi arütkaainjachin wanee wayuu ajaʼtta atachi sünainmüin wayuu. Saashin tü pütchi naapakat Jehová nümüin Moisés, oʼunuinjachi wanee ajaʼtta atachi eemüin chi sacerdotekai süshatapa nüta. Nüküjaka Jesús namüin na polooshiikana wayuu  noʼunuinjanain eemüin chi sacerdotekai, wopuluʼupa naya, ashatüsü tü natakat. Niasaʼa wanee naʼakajee aleʼejaashi nia nüchikuaʼa eemüin Jesús süpüla naapüin analuʼut nümüin jee süpüla nuʼwaajüinjachin chi Maleiwakai. Waneeshia neʼe chi aapakai analuʼut nümüin Jesús naʼakajee na polooshiikana.

Eejatü wanee wayuu ayuuisü maʼin. 12 juya amülain isha sümüin. Aneesü maʼin shia süchikuaʼa. Amülüʼiraasü shia saʼakajee tü wayuukalüirua nünainmüin Jesús süpüla shipettüin nüsheʼin. Shipettapa shia, oʼunusü tü ayuuliikat suulia. «¿Jara epettaka tasheʼin?», nümaka Jesús. Sürütkaaka nünainmüin Jesús sümaa mmoluin shia. Süküjaka nümüin sünain shiain epettüin tü nüsheʼinkat jee sünain anaitpain shia nutuma. «Nii waaʼiraa, anaitpa pia. Anasü puʼunule sünain anain paaʼin», nümaka Jesús sümüin süpüla nümülialüin saaʼin.

Eeshi wanee wayuu Jairo münüshi, laülaashi nia suluʼu tü ekirajüleekat tü judíokalüirua. «Jooʼuya tamaaiwa pia miichipaʼamüin. Ayuuisü maʼin wanee tachon», müshi nümüin Jesús. Nnojoliiwaʼaya nüntüin Jesús nipialuʼumüin Jairo, anaajaasü tü jintutkat. Nüntapa Jesús nipialuʼumüin Jairo, wainma wayuu aʼyalajüsü nüpüla süchiirua tü jintutkat. Nümaka Jesús: «Nnojo jiʼyalajüin. Tü jintutkat, atunkusü neʼe». Naapaaka Jesús sajapü tü jintutkat sümaa nümüin sümüin: «¡Tachee, püchijiraa maala!». Ashaʼwalaa müsia tü jintutkat, katüsü soʼu süchikuaʼa. Nümaka Jesús nümüin chi süshikai jee tü shiikat süpüla nekirüinjatüin shia. ¡Talatakajasaʼa naaʼin na wayuu kachonkana shia!, ¿aashimüin?