Maʼaka jeʼra kaʼi süchikijee nuwoutisaajünüin Jesús, oʼttushi nia sünain aküjaa pütchi. Maʼwaishi nia: «Alüʼütsü nükalia chi Maleiwakai süpüla Aluwatawaa». Oʼunawaishii na nikirajüinkana nümaa suluʼupünaa tü mmakat Galilea otta Judea. Nüleʼejapa Jesús nüchikuaʼa Nazaretmüin, oʼunushi nia eemüin tü ekirajüleekat na judíokana jee nujutatka tü pütchi nünüikimaajatkat Isaías, anuu tü pütchi naashajeʼerakat: «Naapüin tamüin Jehová tü nüpülainkat süpüla taküjain tü pütchi anasükat». ¿Kasa nüküjeeka achiki Jesús? Neʼreein maʼin na wayuukana naainjain Jesús kasa pülasü napüleerua. Nnojotpejeʼe naapüin Jehová nümüin Jesús tü nüpülainkat süpüla naainjain neʼe kasa pülasü, süpülajatü nüküjain maʼin tü pütchi anasükat. «Ekeraajüsü pütchikat tüü soʼukai», nümaka Jesús namüin na aapajakana nünüiki.

Nuʼunaka Jesús mapa eemüin tü palaakat Galilea. Niʼraka pienchishii wayuu olojulii jime. «Anashii tamaatalai jia. Maa aka olojuliin jia jime, okotchajüinjana jia wayuu tamüin», nümaka namüin. Anuu nanülia: Pedro, Andrés, Santiago otta Juan. Napütüin tü nakusuinkat süpüleerua oʼunaa nümaa Jesús. Noʼunaka nümaa Jesús sainküinpünaa Galilea sünain aküjaa süchiki nukuwaʼipa Maleiwa sünain Aluwatawaa. Ekirajüshii naya pütchi suluʼupünaa tü ekirajüleekat na judíokana, metkaaruluʼu otta pueulopaʼa. Wainma wayuu anoujakana sutuma nanüiki eepünaale naya. Suʼwalakajaaka nüchiki Jesús wattapünaa maʼin otta aapünüsü nüchiki sainküinpünaa tü mmakat Siria.

Naapaka Jesús laülawaa namüin waneinnua nikirajüin süpüla neiyajüin wayuu eekai ayuulin jee süpüla nojuʼitirüin yolujaa süleʼeruʼujee wayuu. Eeshii waneinnua oʼunakana nümaa Jesús sünain aküjaa pütchi suluʼupünaa tü pueulokalüirua. Eejana jieyuu kanoulaka maʼin nünain chi Maleiwakai. Anuu nanülia noʼutku: María Magdalena, Juana, Susana otta waneirua, akaalinjünüshi Jesús otta na nikirajüinkana natuma.

Kettaapa niʼiküin Jesús na nikirajüinkana, nüjütüin naya sünain aküjaa pütchi. Sutuma naküjain pütchi suluʼupünaa tü mmakat Galilea, wainma na wayuu anoujakana nünain Jesús otta na woutiisakana. Wainma na wayuu anoujeekana nünain Jesús, müsüjeseʼe nüküjain müin aka saaʼin naya wanee aʼttiee kettaaka süpüla akotchojuna achon. «Juchunta nümüin Jehová nuluwataaiwa nooʼomüin wayuu süpüla nakotchojuin süchon tü aʼttieekat», nümaka Jesús. Mapa, nüneeküin Jesús 70 nikirajüin jee nüjütüin naya piamawai  sünain aküjaa pütchi suluʼupünaa Judea. Aashajaashii naya sümaa wayuu maʼleekalia süchiki Nuluwataainjachin Maleiwa. Naleʼejapa nachikuaʼa, watta saalii kasa anasü naküjeeka nümüin Jesús süchiki tü naainjakat. Isaleesia nüchiki chi Yolujaakai nüshaʼwaleʼerüin tü aküjaakat pütchi.

Niʼiküin Jesús na nikirajüinkana süpülapünaa nuʼunuin iipünaamüin süpüla ayatüinjanain naküjain pütchi. Anuu nünüiki namüin: «Jüküja jümaala tü pütchi anasükat suluʼupünaa Mmakat süpüshuaʼa. Jikiraja wayuu sünain tü Nünüikikat Maleiwa sümaa juwoutisaajüin naya».