Maʼaka jeʼra kaʼi süchikijee tü Pascuakat, aleʼejüshi Jesús namaa na nikirajüinkana Galileamüin. Nantaka Samariamüin jee nojuntaaka suluʼumüin wanee mma pejesü sünain tü pueulokot Sicar. Neemeraaka süʼütpaʼa wanee ishi nüsüle Jacob münüsü. Makataka Jesús yala otta noʼunaka na nikirajüinkana sünain ayaʼlajaa eküülü pueulopaʼamüin.

Süntaka wanee jiet sünain ajaʼitaa wüin. «Püsiʼra maa taya wüin», nümaka Jesús sümüin. «¿Jamüshi paashajaaka tamüin sümaa wayuuin samariajeʼewat taya? Nnojoishii anajiraain na judíokana namaa na samariajeʼewaliikana», sümaka. «Müleka pütüjaale saaʼu jaralin taya, puchuntuinjeʼe tamüin asaʼire wüin. Jee tasiʼrüinje pia tü wüin katakalü atuma soʼu wayuu», nümaka Jesús sümüin. Süsakiraka nia tü jietkat: «¿Jamaluʼut pünüiki? ¿Jalasü iita pajaʼitajatka aka tü wüinkat tamüin?». Nusoutaka Jesús: «Chi eekai nüsüin tü wüin taapakat, müichia nnojolin miñaasüin nüchikuaʼa». Sümaka tü wayuukot nümüin: «Señotkalee, tasa maa türa wüin paashajaakalü achiki».

«Püma nümüin chi puʼwayuusekai nüntaiwa», nümaka Jesús sümüin. «Maʼwayuusesat taya», müsü shia. «Lotusü tü pümakat tamüin sünain maʼwayuusein pia. Jaʼraituairü maʼin pia ooʼulaain puʼwayuuse. Jee chi pümaakai maaʼulu yaa, nnojoishi puʼwayuusein», nümaka Jesús. Susoutaka nümüin: «Eekajaʼa eere pia saaʼin tamüin nünüikimaajachi Maleiwa. Na watuushinuu Samariajanakana, naʼwaajüin Maleiwa yaa saaʼu tü uuchikat. Akaajasaʼa jaajüin jiakana judíokana, chainjachi aʼwaajünüin Maleiwa Jerusalén. Tatüjaa aaʼuchi nieechin chi Mesíaskai ekirajaka waya jamüinjatüin wakuwaʼipa sünain aʼwaajaa Maleiwa». Nüküjaka Jesús sümüin tü wayuukot wanee kasa nnojoyütkalia nüküjain sümüin wayuu. «Taya chi Mesíaskai», nümaka sümüin.

 Oʼunamaatüsü tia jietkat pueulopaʼamüin. «Tantüichipa anain chi Mesíaskai. Nüküjain süpüshuaʼa tü taaʼinrapuʼukat. Jooʼuya tamaaiwa jia otta jiʼraiwa nia», sümaka namüin na chajanakana Samaria. Noʼunaka sümaa eemüin tü ishikat süpüla naapajüin nünüiki Jesús.

Shiasaʼa joo mapa aʼalijinnüshi Jesús natuma. Makataka Jesús namaa soʼu piama kaʼi otta nikirajaka naya sünain wainma kasa. Watta naalii na anoujakana nünain Jesús. «Sutuma waapajüitpain nünüiki chi wayuukai, wayaawatüitpa aaʼu sünain shiimain niain chi oʼttaainjachikai atuma wayuu süpüshuaʼa», namaka sümüin tü wayuukot.