Aaʼuriiroʼu soʼu tü juyakat 30 soʼu wakalia, antüshi Jesús Jerusalénmüin. Watta naalii na wayuu antakana süpüla tü Pascuakat. Sünain tia miʼiraakat, asülajüshii na wayuukana mürüt nümüin chi Maleiwakai, eejana wayuu antitka namüʼlüin, akanasaʼa waneinnua ayaʼlajüshii mürüt chaa Jerusalén.

Nüntapa Jesús eere tü aʼwaajüleekat Maleiwa, niʼrüin waneirua wayuu sünain oikawaa mürüt. ¡Oikaashii neʼe naya suluʼu tü miichi aʼwaajüleekat Jehová! ¿Kasakaʼa naaʼinrüin Jesús? Naapaain wanee jiiku süpüla niipiijüin anooipaʼamüin tü paaʼakalüirua otta tü anneetkalüirua. Nuʼwachijaain nemeesain na aʼwanajaaliikana nneerü jee suʼwalakajaaka tü nanneetsekat. «Jujuʼitira tü  wüchiikalüirua yaajee yaa. Nnojotsü oikaaleein jüpüla nipia chi Tashikai», nümaka Jesús namüin na oikaaliikana toomasü.

Ponusü maʼin saaʼin tü wayuukalüirua shiʼrapa tü naaʼinrakat Jesús. Sotoka naaʼin na nikirajüinkana tü pütchi ashajünakat paala nüchiki chi Mesíaskai suluʼu tü karaloʼuta nüchikimaajatkat Maleiwa, tü makat mayaa: «Keeʼireesü maʼin taaʼin kojuteein tü nipiakat Jehová sutuma wayuu».

Mapa, soʼu tü juyakat 33 soʼu wakalia, nuʼwulejüin Jesús süchikuaʼa tü aʼwaajüleekat Maleiwa. Kojutushaatasü nümüin tü miichi aʼwaajüleekat otta niyoutuin süpüleerua eeinjatüin wayuu eekai mojutuin atuma nipia chi Nüshikai.