Woutiisapa Jesús, oʼuninnüshi nia sutuma tü nüpülainkat Maleiwa chaa isashiipaʼamüin. Meküinsai nia soʼu 40 kaʼi makalaka outuin nia jamü. Nüntaka joo chi Yolujaakai süpüla nuuʼulaküin naaʼin Jesús. «Müleka shiimainre nüchoin pia Maleiwa, püma sümüin türa ipakalüirua eküülüjaaiwa shia», nümaka nümüin. Nusoutaka Jesús nümüin: «Müsü tü Ashajuushikat, nnojotsü shiain neʼe choʼujaain sümüin wayuu tü eküütkat süpüla katüin soʼu, choʼujaasia namüin naapajüin nünüiki Jehová».

Nuuʼulakaka chi Yolujaakai naaʼin Jesús nüchikuaʼa. «Müleka shiimainre nüchoin pia Maleiwa, pumutta maala iipünaajee saaʼujee tü miichi aʼwaajüleekat. Mataasü sümakai tü Ashajuushikat, nuluwataajeenain Maleiwa na aapieekana süpüla nuʼtteʼerüin pia», nümaka nümüin. Nusoutaka Jesús nüchikuaʼa süka tü Ashajuushikat: «Müsü tü Ashajuushikat nnojolinjachin puuʼulaküin naaʼin Jehová».

Süpüla nuuʼulaküin Satanás naaʼin Jesús apünüintua niiʼiyatüin nümüin süpüshuaʼa suluwataaya wayuu otta tü suwashirüinkat. Müshi nia nümüin: «Taapeerü pümüin süpüshuaʼa suluwataaya wayuu jee tü suwashirüinkat müleka püsapainkale tamülatuʼu uwatua neʼe». Nusoutaka Jesús niʼipajee: «Puʼuna mmata toulia Satanás. Müsü tü Ashajuushikat niainjachin neʼe Jehová aʼwaajünaka nümüiwaʼa».

Nuʼunaka joo chi Yolujaakai nümaʼanajee Jesús, jee antüshii waneirua aapiee nünainmüin Jesús sünain eʼikajawaa niküin. Süchikijee tia, oʼttushi Jesús sünain aküjaa süchiki Nuluwataainjachin Maleiwa. Aapünüsü tia aʼyatawaakat nümüin nutuma Jehová. Kamalainsü sümüin wayuu tü nikirajakalü anain Jesús otta oʼunushii naya nümaa eepünaale nia.