Oʼunushi Jesús namaa na aluwataaushikana eemüin tü uuchi kanüliakat Olivos, alatüshii naya eepünaa wanee patajatshii Cedrón münüsü. Chajana naya süseʼeruʼu aika jee jotoshootoshi chi Kashikai soʼu tia. Nuʼunaka Jesús namaa na aluwataaushikana wünaʼapümüin eere tü kanüliakat Getsemaní. «Anakajaʼa müleka yaale jia sümaa eein jaaʼin», nümaka Jesús namüin. Nuʼunaka Jesús nümüiwaʼa mamüin aka tüsa sünain achuntaa nümüin Maleiwa. Nüsapainkaka nia sümaa mojuin maʼin naaʼin sünain nümüin nümüin Jehová: «Anakajaʼa shiale paaʼinrüin tü püchekakat tapüleerua». Nüntaka wanee aapiee nümaʼanajeejachi Maleiwa süpüla nükatsüinrüin naaʼin. Süchikijee tia, nürütkaaka Jesús nanainmüin apünüinshii aluwataaushii eere natunkajaʼattaain nüpüla. «¿Jamüshii jia jutunkaka maʼin? ¿Jamüshii jia nnojoliikaʼa eejüin jaaʼin? Antüitpa takalia süpüla taapünüinjachin ekii sajapuluʼu taʼünüü», nümaka namüin.

Wanaa sümaa yootuin Jesús, antüshi Judas sümaa wainma wayuu wunuʼumaaka otta chajaruutamaaka. Nütüjaa aaʼu Judas jalainjanain naya nüpüla süka kojuyatuain nuʼunuin nümaa Jesús chaa Getsemaní. Jee Judas nüküjain namüin na surulaatkana wopuluʼu jamüinjatüin sukuwaʼipa süpüla natüjaain saaʼu jaralin Jesús. Nürütkaaka jooluʼu Judas nünainmüin Jesús sünain nümüin: «Jesús, anii taya antüin». Jee nuchuʼlaka nuwalapaʼa. «Judas, paapa ekiichi taya süka puchuʼlüin tawalapaʼa», nümaka Jesús nümüin.

Nürütkaaka Jesús nanainmüin na wayuu antakana. «¿Jarai jüchajaaka achiki?», nümaka namüin. «Nia Jesús chi Nazaretjeʼewaikai», namaka na wayuukana. Nusoutaka Jesús: «Taya tayakai». Wanaa sümaa nümüin Jesús tia namüin, ansünajaashii sünain noʼnnajaain. Nüsakiraka Jesús naya nachikuaʼa: «¿Jarai jüchajaakai achiki?». Nasoutaka nümüin: «Nia Jesús chi Nazaretjeʼewaikai». Nümaka Jesús: «Tamüinnapa jia sünain tayain tayakai. Müleka tayale jüchajaain achiki, juuʼulaa noʼunaiwa na wayuu yaakana tamaa».

Jee müshia Pedro, nuwataaka nooʼomüin wanee nüchepchia chi laülaashikai napüleerua na sacerdotekana. Nüchotooko tü nücheʼekat süka wanee chajaruuta. Malco nünülia chia achepchieekai. Niʼitaaka najapü Jesús saaʼu nücheʼe chia wayuukai, anaka nia nutuma. «Pünaajaa püchajaruutse, pütkaale süka tü chajaruutakat, outeechi neʼe pia süka chajaruuta», nümaka Jesús nümüin Pedro.  Amaanüshi Jesús natuma na surulaatkana sümaa kapüin najapü. Naʼluwataaka na aluwataaushikana wanaa sümaa tia. Jee tü wayuukalüirua suʼunirüin Jesús nümaʼanamüin Anás chi laülaashikai napüleerua na sacerdotekana. Asakinnüshi jooluʼu Jesús nutuma Anás, niʼikajeʼeraka joo Jesús nümaʼanamüin Caifás chi wanee laülaashikai napüleerua na sacerdotekana. ¿Kasakaʼa alatüin namüin mapa na aluwataaushikana?