Süchikijee outuin Jesús, oʼunushi wanee wayuu washirü kanüliakai José nümaʼanamüin Pilato. Nuchuntaka José nümüin Pilato süpüla nüshakatirüin müliashii. Nükoʼoloka Jesús süka wanee kuluulu anasü maʼin kanüliasü lino. Nushuleraka wanee wunuʼu jemeta eejuu naaʼu. Niʼitaaka nia suluʼu tü woowirakat sünain nüsürülüin shia süka wanee ipa miyoʼu. «Wainmajüsü waaʼin suulia süntajüin tü nikirajüinkalüirua sünain suʼluwajüin müliashii süpüla naküjainjatüin süsoʼiraaitpain naaʼin süchikijee outaa», namaka nümüin Pilato na laülaashiikana napüleerua na sacerdotekana. «Jiʼitaa waneinnua surulaat süpüla neʼrajüinjatüin saaʼu tü woowirakat», nümaka Pilato namüin.

Apünüin kaʼi süchikijee tia, antüsü wanee jieyuu wattaʼa maalü sünain anaʼlawaa sümüin tü woowirakat. Ainküsü neʼe naaʼin süka neʼrüin jutatüin tü shiʼrousekat. Eejachi napüla wanee aapiee. «Nnojo mmoluin jia. Asoʼiraaitpa naaʼin Jesús. Jüma namüin na nikirajüinkana Jesús noʼunaiwa Galileamüin neʼraiwa nia chaʼayaa», nümakalaka namüin.

Suwataamaataka María Magdalena sünain achajawaa nüchiki Pedro nümaa Juan. «Alüʼüjünüshi müliashii», sümaka namüin. Nawataamaataka sünain anaʼlawaa sümüin tü woowirakat. Neʼrapa sünain malujunain napüla, aleʼejaashii naya nachikuaʼa nepialuʼumüin.

Aleʼejüsü María süchikuaʼa eemüin tü woowirakat. Shiʼraka piamashii aapiee. «Nnojotsü tatüjaain saaʼu jalakualin nülüʼüjünüin müliashii», sümaka namüin. Shiʼraka mamüin aka tüsa wanee wayuu, niayaa saaʼinruʼu wanee wayuu apünajüi. Süsakiraka nia: «¿Pütüjaa aaʼuchi jalakualin alüʼüjünüin müliashii?». Wanaa sümaa «María» nümüin chi wayuukai sümüin, shiyaawata aaʼuchi niain Jesús. «Ekirajüikalee», sümaka nümüin, shiʼyalajaka sümaa suwaʼülaain nunuloʼupünaa. «Püma namüin na tawalayuukana sünain piʼrüitchipain taya», nümaka Jesús sümüin. Suwataamaataka María süpüla süküjain namüin na nikirajüinkana Jesús sünain shiʼrüitchipain nia.

Shiasaʼa joo mapa, eeshii piamashii nikirajüin Jesús ojuʼitüshii naya Jerusalénjee, chaʼwalii naya Emaús. Nürütkaaka wanee wayuu nanainmüin sümaa waraittüin nia namaa. Nüsakiraka chi wayuukai kasain naashajaain achiki. «Atak, ¿nnojotyülia pütüjaain saaʼu tü alatakat? Alatüirü apünüin kaʼi süchikijee nuʼutinnüin aaʼin Jesús natuma na laülaashiikana napüleerua na sacerdotekana. Shiasaʼa joo, eesü waneirua jieyuu eʼraka nia sünain süsoʼiraaitpain naaʼin», namaka nümüin. «¿Nnojotsüsaʼa junoujain sünain tü namakat na nünüikimaajanakana Maleiwa? Mataasü namaka outajachin chi Mesíaskai sümaa  süsoʼiraainjatüin naaʼin», nümaka chi wayuukai namüin. Ayatüshi chi wayuukai nüküjain namüin tü pütchi ekeraajakat suluʼu tü Ashajuushikat nüchiki chi Mesíaskai. Shiasaʼa nantapa Emaús, «anashi wamaale pia» müshii na nikirajüinkana Jesús nümüin chi wayuukai. Süpülapünaa nekaain pan, nuchuntaka chi wayuukai nümüin Maleiwa, nayaawataka aaʼu niain Jesús chi wayuukai. Yüüʼülaa nümaka noulia.

Noʼunamaataka joo na nikirajüinkana Jesús Jerusalénmüin. Nantaka suluʼumüin wanee miichi eejanale jutkatüin napüla na aluwataaushikana otta naküjaka namüin tü alatakat namüin. Sümaʼainruʼu yalajanain naya jutkatüin, eeʼiyataashi Jesús namüin. Nnojotsü nanoujain anain paala sünain niain Jesús chi neʼrakai. «Jiirakaa sümüin sülioʼu tajapü, jipetta taya. Ashajünüsü paala sünain süsoʼiraainjatüin naaʼin chi Cristokai saʼakajee tü outusükalüirua», nümaka Jesús namüin.