Amaanüshi Jesús natuma na laülaashiikana napüleerua na sacerdotekana eemüin nipia chi süʼlaülakai mma. «¿Kasa naainjalaka wayuukai chii?», nümaka joo Pilato namüin naya wayuukana. Namaka nümüin: «Nia wanee aluwataai naashin». Nüsakiraka Pilato Jesús: «¿Piaʼaya chi aluwataashikai saaʼu wayuu judío?». «Nnojotsü yaajeʼewalüin mmapaʼa tü taluwataayakat», nümaka Jesús.

Aluwataanüshi Jesús mapa nutuma Pilato eemüin Herodes, chi aluwataakai saaʼu Galilea süpüla kasalajanain naainjala nutuma. Niasaʼa Herodes niyaawata aaʼuchi maainjalain Jesús, nuluwataaka nia nüchikuaʼa eemüin Pilato. «Tayakai nümaa Herodes wayaawata aaʼu maainjalain wayuukai chii. Tajütirüinjachi achiki nia», nümaka joo Pilato sümüin tü wayuukalüirua. «Puʼutira naaʼin, puʼutirapan», sümaka tü wayuukalüirua sümaa emetuluin sünüiki. Niʼyaajünaka Jesús natuma na surulaatkana, ejetüna aaʼuchi nia sümaa nüsheʼetünüin. Shiʼitaanaka nünain wanee kotse keipüsesü saaʼu nikii otta nemeeʼerainpalashi nia. Müshii naya nümüin Jesús: «Jamayaa pia aluwataashikalee». Nusoutaka joo Pilato nüchikuaʼa sümüin tü wayuukalüirua: «Maainjalasai wayuukai chii». Sümaka tü wayuukalüirua sümaa emetuluin maʼin sünüiki: «Pükacherapan». Naapaka Pilato nikii Jesús sümüin tü wayuukalüirua süpüla nuʼutunajachin aaʼin.

Nuʼuninnaka Jesús eemüin wanee wutai kanüliasü Gólgota. Nükachennaka Jesús sünain wanee wunuʼu lotusü. Nuchuntaka Jesús nümüin Jehová sünain maa: «Taata, moto paaʼin tü kasa mojusü naaʼinrakat naya wayuukana». Nemeeʼerainpalashi maʼin Jesús na wayuukana sünain müin nanüiki: «¡Shiimainreje Nüchoin pia chi Maleiwakai püshakata yalejeechiki kataiwa poʼu!».

Müsü nünüiki wanee kaʼruwarai yalajachikai kachetüin nüʼütpaʼa Jesús: «Anashi sotule taya paaʼin püikalaapa sünain aluwatawaa». «Tamüshi pia soʼu kaʼikat tüü, cheechi pia tamaa suluʼu tü Paʼaraiisükat», nümaka Jesús nümüin. Shiasaʼa aliika, shipiyuushijaaka mmapaʼakat soʼu apünüin oora. Eejana waneinnua nikirajüin Jesús yalajanakana shaʼwatüin peje sünain eere nükachennüin, eejatü namaa María tü niikat Jesús. «Paaʼinmaja María, müinjatü aka saaʼin wanee pii pümüin», nümaka Jesús nümüin Juan.

«Kettaaitpa tatuma», müshi joo Jesús süpülapünaa outuin nia. Outaka nia süchikijee tia. Wanaa maʼin sümaa tia, akutkujaasü mmaka jee asüküijaasü tü kuluulu pasanainkat suluʼu tü Aʼwaajüleekat Maleiwa. «Shiimainñala maʼin  sünain niain chi Nüchonkai Maleiwa», nümaka joo chi sülaülakai surulaat shaʼwatakai nümülatuʼu Jesús.