Sülatapa poloo kaʼi süchikijee nuʼunuin Jesús iipünaamüin, naapüin Maleiwa tü nüpülainkat namüin na nikirajüinkana. Tia soʼujatü tü Miʼiraa kanüliakat Pentecostés soʼu juyaka 33 soʼu wakalia. Watta saalii wayuu antaka Jerusalénmüin süpüla tia miʼiraakat, suluʼujeejana naya mma wattajee. Noutkajaaka 120 nikirajüin Jesús suluʼu wanee miichi iipünaasü, neʼraka wanee kasa anashaatasü maʼin. Eejaʼalaa sümaka wanee sikoʼu naraloʼujee waneʼewai nakua na nikirajüinkana Jesús; noʼttaka sünain aashajawaa suluʼu waneirua anüikii naatajannuu. Jee süntaka wanee joutai katsüinsü maʼin suluʼupünaa tü miichikat.

Na wayuu antakana suluʼujee mma wattajee, naapüin suʼlotuin tü joutaikat suluʼu tü miichikat. Nawataaka süpüla natüjaain saaʼu kasain alatüin suluʼu tia piichikat. Ainkuusü naaʼin neʼrapa na nikirajüinkana Jesús sünain aashajawaa suluʼu anüikii naatajatü. «Wayuu galileajeʼewalii naya. ¿Jamakaʼa waapaka sünain naashajaain süka tü pütchi waashajaakalü aka waneʼewai wakua?», müshii naya.

Nüshaʼwalaaka Pedro namaa waneinnua aluwataaushii pasanain sünain tü wayuukalüirua. Nümaka: «Jiakana, juʼuta aaʼinchi Jesús. Nüsoʼireerapejeʼe  Jehová naaʼin nüchikuaʼa. Maaʼulu yaa, chashi Jesús nikialuʼujee Maleiwa. Naapüinjeseʼe wamüin Jesús chi naaʼinkai Maleiwa maʼaka nüküjain shia paala wamüin. Müsüjeseʼe jiʼrüitpain tü kasa pülasü jaapakalü achiki».

Ponoshootosü saaʼin tü wayuukalüirua tü alatakat. Antüsü suluʼumüin naaʼin tü pütchi nüküjakat Pedro namüin. «¿Kasa anaka süpüla waaʼinrüinjatüin jooluʼu?», sümaka tü wayuukalüirua. «Jiyaawajaa jümata suulia jaainjala otta juwoutisaaja saaʼu nünülia Jesús. Nüjüteetka Maleiwa jümüin tü nüpülainkat», nümaka Pedro namüin. Soʼu tia, woutiisashii 3.000 wayuu. Soʼujeʼereeya kaʼikat tia, aʼwainmalaashii na nikirajüinkana Jesús chaa Jerusalén. Akaalinjünüshii na aluwataaushikana sutuma tü nüpülainkat Maleiwa süpüla sukumajaain wainma outkajaalee. Mayaa, neʼiküin na anoujashiikana sünain süpüshuaʼa tü kasa nuluwataakalü anain naya Jesús.