Süchikijee nujuʼituin Adán sümaa Eva suluʼujee Edén, wainma nachonnii. Caín nünülia chi palajachikai nachon, apünajüi nia. Abel nünülia chi emülieekai, arüleejüi nia anneerü.

Soʼu wanee kaʼi, niʼikajaain Caín otta Abel tü nasülajüinjatkat nümüin Jehová. ¿Pütüjaa aaʼu kasain nasülajüin nümüin Jehová? Saʼanasia tü kasa eejatkat namaʼana. Talatüshi Jehová sümaa tü nüsülajalakat Abel otta nnojoishi talatüin sümaa tü nüsülajalakat Caín. Aashichijaashi Caín sutuma tia. Achiaanüshi Caín nutuma Jehová süpüla nnojolinjachin naainjain kasa mojusü sutuma naashichijaain. Macheʼesai Caín nümüin Jehová.

Müshi neʼe Caín nümüin Abel: «Anakaja wawaraijaale saʼakapünaa mojuui». Namüiwaʼapa naya, nuʼutaka naaʼin Abel,  chi nimüliakai. ¿Kasakaʼa naaʼinrüin Jehová? Nüjünajaain Caín wattamüin suulia nüpüshi. Nnojoishi niiteʼerüin nia nüchikuaʼa.

¿Kasa watüjaka sünainjee tia? Eeshii jashichijaale waya sutuma mojuin wanee kasa anainjatiaaka waaʼinruʼu. Wayaawatüle saaʼu jashichin maʼin waya otta nayaawatüle saaʼu na waneinnua, anashii wooʼulaale suulia jashiee jee wachecherüle waaʼin suulia kaainjalajüin waya sünainjee.

Aishi maʼin Jehová nüpüla Abel otta lotusü nukuwaʼipa noʼuluʼu. Makalaka soteechin nia naaʼin waneepia. Kateerü noʼu Abel nüchikuaʼa nutuma Jehová paʼaraiisüpa tü Mmakat.