Süʼütpaʼa Babel, eejatü wanee pueulo kanüliasü Ur. Na wayuu kepiakana yala, nnojoishi naʼwaajüin Jehová, naʼwaajüin waneirua maleiwayaasü. Eejaipajaʼa wanee wayuu aʼwaajaka Jehová. Abrahán nünülia.

Müshi Jehová nümüin Abrahán: «Anakajaʼa puʼunule suluʼujee tü mmakat eere kepiain pia otta püpüta püpüshi. Puʼuna eemüin wanee mma teeʼiyatüinjatka pümüin». Nüpansaaka nünüiki nümüin, nümaka: «Watteerü saalin tü puuʼuliwoʼukalüirua. Sünainjee tü kasa anasü taaʼinreetkat püka, anakuwaʼipaleerü wayuu wainmayaa».

Nnojotsü nütüjaain aaʼu Abrahán jalainjachin nia aluwataanüin nutuma Jehová, niʼitaapejeʼe naaʼin nünain. Jaa müshi Abrahán sümaa Sara nümüin Maleiwa, akaʼaya Taré, chi nüshikai otta Lot chi nüsiipükai. Yapaja müsia natuma nachise süpüla oʼunaa jee oʼunaajaa namüin yalejee.

 Wanaa sümaa nüntüin Abrahán suluʼumüin tü mma niiʼiyatakat Jehová nümüin 75 nuuyase. Canaán sünülia tia mmakat. Müsü nünüiki Jehová nümüin Abrahán chayaa: «Süpüshuaʼa mmakat tüü, taapeerü shia namüin na puuʼuliwoʼukana». Akaisaʼa Abrahán sümaa Sara laülaainna sümaa machooin naya. ¿Kaseetche naaʼinraka Jehová süpüla nikeraajüin nünüiki?