Süchikijee tü juya miyoʼushaatakat, aʼwainmalaashii nüchonnii Noé otta na nüikeyuukana. Aʼwainmalaashii maʼin na wayuukana sainküin tü Mmakat maʼaka nüküjatüjülin shia Jehová.

Akanasaʼa eejanain waneinnua wayuu macheʼekana sümüin nünüiki Jehová. «Jooʼuya wakumajaiwa wapüla wanee pueulo miyoʼushaata. Wakumajeerü wanee aliikajaalee chaa sutuʼupaʼamüin tü sirumakat. Sükajee tia, kojuteena waya sutuma wayuu süpüshuaʼa», müshii naya.

 Mojusü nümüin Jehová tü naainjakat naya wayuukana, makalaka nuuʼuleʼerüin naya suulia tia. ¿Pütüjaa aaʼu kasain naainjain Jehová? Katataawasü nutuma sukuwaʼipa nanüiki naya wayuukana. Süka nnojoluitpain nayaawatüin saaʼu nanüiki na waneinnua, ooʼulaashii suulia akumajaa tia miichikat. Babel münüsü tia pueulo nakumajakat, süka katataawain nutuma Jehová sukuwaʼipa nanüiki na wayuukana chayaa. Naʼwalakajaaka na wayuukana sünain kepiaa sainküinpünaa tü Mmakat. Akanasaʼa ayatüinña naya sünain aainjaa kasa mojusü. ¿Eejaiche wanee wayuu aikai apüla Jehová soʼu tia? ¿Jamüsüjaʼa saaʼin pümüin? Wekirajaajeerü anain tia suluʼu tü wane ekirajaayakat.