Aleʼejüshi Moisés nüchikuaʼa nümaa Aarón eemüin faraón, naküjaka nümüin tü nümakat Maleiwa: «Müleka nnojorüle püjütüin tapueulose, tantireerü taapana jünainmüin». Tia müsü aka saaʼin wanee merüle, aisü sütaʼa. Watta maʼin saalii taapana ekerotoko nepialuʼumüin na egipciokana, antüsü nümüin eekai maʼletsein otta eekai washirüin. Arülayaai neʼe taapana suluʼu tü mmakat Egipto. Shiasaʼa suluʼu tü mmakat Gosén, eejanale kepiain na israelitakana, nnojotsü eein taapana. Tia pienchikat kasa mojusü otta tü waneirua nüntirüinjatkat Jehová, naya neʼe antaka amüin na egipciokana, nnojotsü antüin namüin na israelitakana. Achuntashaatashi Faraón nümüin Moisés: «Puchunta nümüin Jehová süpüla nüsünneʼerüinjatüin tü taapanakat, tajüteetka tü nupueulosekat». Nüsünneʼerapa Jehová tü taapanakat, nnojoishii nüjütüin faraón na israelitakana. ¿Ayateeiche Faraón macheʼein?

Nümaka joo Jehová: «Müleka nnojorüle nüjütüin Faraón tü tapueulosekat, ayuuijeerü jee outeerü tü namüʼlüinkalüirua». Waneemüin kaʼi, ekeraajüsü tü nümakat Jehová, nnojotpajaʼa jamajüin namüʼlüin na israelitakana. Sutuma yaletüin naaʼin faraón, ayatüshia nia macheʼein. Nuluwataaka Jehová Moisés nüchikuaʼa eemüin faraón süpüla najapatüinjatüin paliʼi otta nijitüinjatüin shia iipünaamüin. Kaitaka tü paliʼikat sümaa shiiʼiranajaain suluʼu müin aka saaʼin sükalira mma, yooisü otta eʼikaajüsü nata na egipciokana otta tü mürütkalüirua. Ayatapajaʼa Faraón nnojoluin nüjüteein na israelitakana.

Nuluwataain Jehová Moisés nüchikuaʼaya süpüla nümüinjachin nümüin faraón: «¿Jamüsü nnojotka püjüteein tapueulose? Keʼichiiseerü tatuma tü juyakat wattaʼa». Waneemüin kaʼi, nüʼitiraka Jehová wanee juya,  keʼichiisesü, katürülasü otta chuwatüsü siki iipünaajee. Keemashaatasü maʼin tia, nnojotsü eeirüin wanee kasa eekai müin aka saaʼin tia chaa Egipto. Ajaʼttüsü wunuʼulia sutuma otta tü pünajüt eejatkat chaa Egipto, nnojotpajaʼa shia antüin suluʼumüin tü mmakat Gosén. Nümaka Faraón nümüin Moisés: «Puchunta nümüin Jehová süpüla shiyüüʼülaain tü juyakat, tajüteenaka na israelitakana». Ayüüʼülaa müsia tia juyakat nutuma Jehová. Nnojotpajaʼa nikeraajüin faraón nünüiki.

«Ajaʼtteerü shikajüin tü kaashapakat tü pünajüt apütaakat süchikijee tü juyakat», nümakalaka Moisés. Süntaka watta maʼin saalii kaashapa, ajaʼttüsü shikajüin süpana tü wunuʼuliakalüirua otta tü pünajüt apütaakat paala. Nümakalaka faraón nümüin Moisés: «Puchunta nümüin Jehová nüsünneʼeraiwa tü kaashapakat». Nüsünneʼerapa Jehová tü kaashapakat, ayatüshia neʼe faraón macheʼein.

Nümaka Jehová nümüin Moisés: «Piyalera pajapü». Kojokalaka maʼin tü piyuushikat nutuma Jehová, nnojotsü kasain neʼrüin na egipciokana soʼu apünüin kaʼi. Nnojotpajaʼa piyuushin nepialuʼu na israelitakana.

Nümaka faraón nümüin Moisés: «Puʼuna mmata namaa na israelitakana, jüpüta yaʼayaa tü jümüʼlüinkalüirua». Nusoutaka Moisés nümüin: «Wamaainjatü tü wamüʼlüinkalüirua süpüla wasülajüin shia nümüin chi Wamaleiwasekai». Jashichika maʼin faraón sünain maa: «¡Puʼuna yaajee! Toʼuteerü aaʼin pia püleʼejüle püchikuaʼa».