Eejachi wanee wayuu aʼwaajakai Jehová, kepiapuʼushi suluʼu wanee mma kanüliasü Uz. Job nünülia, washirü nia otta wainma nüchonnii. Wayuu anamia, nümüliajüin na maʼletsekana, nükaalinjain na jieyuu outakana aʼwayuuse otta na tepichi mooʼutshiikana. ¿Nnojotsüche kasain alatüin nümüin süka wayuuin anamia nia?

Nnojotsü nütüjaain aaʼu Job nünajüin chi Yolujaakai naaʼu. «¿Pünaja aaʼuchi Job, chi aʼyataakai tamüin? Nnojoishi eein wanee wayuu eekai müin aka naaʼin. Jaa müshi tamüin otta laülaa aaʼinchi», nümaka Jehová nümüin Satanás. Nusoutaka Satanás: «Shiimainña jaa nümüin pümüin süka paaʼinmajüin nia, paapüin kasa anasü nümüin, koumainshi sümaa kamüʼlüin nia putuma. Püsüta nuulia tia süpüshuaʼa, nnojoleechika nuʼwaajüin pia». Nusoutakalaka Jehová: «Puuʼulaka naaʼin, nnojoipejeʼe puʼutuinjachin aaʼin nia». Nuuʼulaain Jehová nuuʼulakünüin aaʼin Job nutuma Satanás, ¿pütüjaa aaʼu jamüin nuuʼulaakaʼa Jehová tia? Shia süka nütüjaain saaʼu noonooin waneepia Job.

Watta saalii tü kasa naainjakat Satanás nüka Job. Nüjütüin palajana wane wayuuinnua, sabeo münüshii, naʼluwajaka nüsachirat otta nüpüliise Job jee ajaʼlajaasü jotuin naʼanneetse Job. Nantaka mapa waneinnua wayuu chejeʼewalii Caldea, naʼluwajüin tü kameeyakalüirua otta noʼutaka naaʼin na nüchepchiakana Job. Süchikijee tia naapa achikichii outuin napüshuaʼa na nüchonniikana. Ojuttusü tü nepiakat naaʼu wanaa sümaa chajanain naya sünain ekawaa. Mojusü maʼin naaʼin Job sutuma tia, nnojoipejeʼe ooʼulaain nia suulia aʼwaajaa Jehová.

Müliasü maʼin naaʼin Job nutuma Satanás, ajaʼttüsü maʼin nüta nutuma. Nnojotsü nütüjaain aaʼu Job jamüin sülataka wainma kasa mojusü  nümüin, ayatapejeʼe nia sünain aʼwaajaa Jehová. Niʼrüin Jehová tia, müshijeseʼe talatüin maʼin nia sutuma waneepiain Job nümaa.

Süchikijee tia, nuluwataaka Satanás apünüinshii wayuu süpüla nuuʼulaküin naaʼin Job. «Aainjashi pia kasa mojusü, nnojotsü püküjeein süchiki. Süsalashi pia tia nutuma Maleiwa», namaka nümüin Job. Nusoutaka Job: «Nnojotsü kasain taainjalain». Niayaa Jehová naaʼinruʼu Job aainjaka tia kasa mojusükat otta nüküjaka nnojoluin lotuin nukuwaʼipa Maleiwa wanaa nümaa.

Eejachi wanee wayuu Elihú münüshi, naapajüin nanüiki naya wayuukana. Nümakalaka: «Nnojotsü shiimain tü jümakat. Anamia Jehová, matüjainsai nia aainjaa kasa mojusü. Niʼrüin kasa süpüshuaʼa otta nükaalinjain wayuu kasale alatüin sümüin».

Nusoutakalaka Jehová nümüin Job: «¿Jalajachi pia wanaa sümaa takumajüin tü sirumatuʼukat sümaa tü Mmakat? ¿Jamüshi tayaka kasirüin paashin tü alatakat pümüin? Aashajaashi neʼe pia sümaa nnojoluin pütüjaain saaʼu jamüin sülataka wanee kasa». Niyaawata aaʼu Job mojuin tü nümakat. «Mojusü tanüiki pümüin. Moto paaʼin taainjala. Taapüin püchiki paala, aluʼusaʼa jooluʼu teʼraajüichipa pia otta püinküin kasa süpüshuaʼa», nümakalaka Job nümüin Jehová.

Nuuʼulaapa Satanás suulia nuuʼulaküin naaʼin Job, aawalaashi nia nutuma Jehová, wainma kasa naapaka nümüin suulialeʼeya tü eejatkat paala nümaʼana. Kakalia katüin noʼu sümaa talatüin nia. Wainma kasa anasü naapaka Jehová nümüin Job. Naainjain tia saaʼujee noonooin waneepia, mayaainjeʼe kapüleein tia. ¿Jama piakai? ¿Püshateerü nukuwaʼipa Job? ¿Puʼwaajeechi Jehová waneepia jaʼitasü kasain alatüin pümüin?