Achepchieeshii na israelitakana natuma na egipciokana otta naʼyateʼerüin maʼin naya. Aluwataanüshi Moisés nümaa Aarón nutuma Jehová nünainmüin faraón süpüla müinjatüin nünüiki: «Püjüta tapueulose isashiipaʼamüin süpüla naʼwaajüinjachin taya». Yaletüsü maʼin naaʼin faraón sümaa nümüin: «Nnojotsü jamajatüin tamüin nünüiki Jehová. Nnojoishii tajütüinjanain na israelitakana». Süchikijee tia, kooʼomüinsü maʼin naʼyataain na israelitakana nutuma faraón. Sünainjee tia, nüntiraka Jehová wanee kasa namüin na egipciokana. ¿Kasa nüntiraka namüin? Nüntirüin poloosü kasa mojusü. «Macheʼesai tamüin faraón. Cheechi nia wattaʼa, wattaʼa maalü sotpaʼa tü süchikat Nilo. Püküja nümüin ishajaainjatüin tü süchikat süka nnojoluin nüjüteein tapueulose», nümakalaka Jehová nümüin Moisés. Jaa müshi Moisés, nuʼunaka eemüin faraón. Niʼraka faraón nücholetirüin Aarón tü waraaratkat, ishajaaka tü wüinkat. Ayatüshia faraón nnojolin nüjüteein na israelitakana.

Akaratshi kaʼi süchikijee tia, nuluwataanaka Moisés nüchikuaʼa nutuma Jehová sünain eʼikajawaa nünüiki nümüin faraón: «Nnojorüle püjütüin  tapueulose, epirajaweerü eperüʼüi tü mmakat Egipto». Shiasaʼa süka nnojoluin jaa nümüin faraón, niyaleraka Aarón tü waraaratkat otta shipirajaaka eperüʼüi tü mmakat Egipto. Eejatü eperüʼüi nepialuʼu na wayuukana, saaʼu natunkule otta suluʼu neitain. ¡Pasanainshii neʼe naya sünain tü eperüʼüikat! «Puchunta nümüin Jehová nüshawaleʼerai toulia tü eperüʼüikat. Tajüteenaka na israelitakana», nümaka faraón nümüin Moisés. Nüshawaleʼeraka shia Jehová. Wainma maʼin tü eperüʼüi outusü neichajaka na egipciokana. Jawaikalaka maʼin tü mmapaʼakat, ayatapejeʼe naʼalijirüin faraón na israelitakana.

Nümaka Jehová nümüin Moisés: «Anasü nütaʼitüle Aarón tü mmakat süka tü waraaratkat. Naainjapa tia, eeʼiranajaweerü shipein tü sümamülakat mma». Ayatakaʼaya shia, müliasü maʼin naaʼin na egipciokana shikajüin shipe. Eeshii waneinnua egipcio makana nümüin faraón: «¡Nia antiraka Maleiwa tü shipekat!». Mayaapejeʼe sülatüin tia, nnojoishii nüjütüin faraón na israelitakana.