Wanaa sümaa chajachin Moisés saaʼu tü uuchikat Sinaí, nuluwataain nia Jehová sünain akumajaa wanee miichi aʼwaajülee. Tia süpülajatü nuʼwaajünüin Jehová natuma na israelitakana. Atsajünawalinjatü süpüla nalüʼüjain shia noʼunajanapa.

Müshi Jehová nümüin Moisés: «Püma namüin na israelita asülajakana tü eekat süpüla nasülajüin sukumajünaiwaʼaya tü miichi aʼwaajüleekat». Naapaka na israelitakana ooro, pülaata, cobre, ipa kojutusü jee korolo kojutusü. Nasülajüin laana, lino, süta mürüt jee waneirua kasa. Wainma kasa nasülajüin, nnojoishii jeʼiyein naya, müshijeseʼe nümüin Moisés namüin: «Kettaajeerü sümaa tüü, wainmaitpa maʼin tü jüsülajakat».

Eeshii tooloyuu otta jieyuu akaalinjaka sünain akumajaa tü miichi aʼwaajüleekat. Naapüin Jehová kekiwaa namüin süpüla anain maʼin sukumajia natuma. Eeshii eeka nasuttajüliin, naʼyapüjüliin otta nasonuliin. Eeshii na süpüʼüyakana ooro, na akumajakana kasa süka ipa otta na akumajaka kasa süka taapüla.

Nakumajüin na israelitakana tü miichi aʼwaajüleekat maʼaka nuluwataain shia Jehová. Nakumajüin wanee kuluulu miyoʼu anachonsü maʼin süpüla piamainjatüin sütaüjia tü miichikat. Sünülia tü paü shiinaluʼukat, «Nümülatuʼu Maleiwa» münüsü otta sünülia tü palajatkat paü «Nüʼütpaʼa Maleiwa» münüsü. Suluʼu tü paü «Nümülatuʼu Maleiwa» münakat, eejatü tü jurasükeetkat, aainjuushi süka wunuʼu acacia otta süka ooro. Suluʼu tü paü «Nüʼütpaʼa Maleiwa» münakat, eejatü wanee ranpara aainjuushi süka ooro, wanee meesa otta wanee aʼajülee wunuʼu jemeta eejuut, oʼoojiruushi süka ooro. Eejatü wanee aʼajülee mürüt chaa paatialuʼu jee wanee oʼlojia aainjuushi süka cobre. Wanaa  sümaa neʼrüin na israelitakana tü jurasükeetkat, sotusü naaʼin napansaajüin nanüiki nümüin Jehová.

Nüneeküin Jehová Aarón otta na nüchonniikana Aarón süpüla sacerdotein naya suluʼu tü miichi aʼwaajüleekat. Nayainjana aaʼinmajaka tia jee aʼajaka mürüt nümüin Jehová. Nia Aarón chi laülaakai napüleerua na sacerdotekana otta nia ekerotuinjachika nümüiwaʼa suluʼu tü paü «Nümülatuʼu Maleiwa» münakat. Uwatua juyawai, aʼajüshi Aarón mürüt nümüin Jehová saaʼu naainjala, saaʼu naainjala nüchonnii jee saaʼu naainjala na israelitakana.

Kettaasü natuma na israelitakana tü miichi aʼwaajüleekat Maleiwa wanee juya süchikijee nojuʼitüin Egiptojee. Eeitpa wanee miichi süpüla naʼwaajüin Jehová.

Ashakatüsü nüpülain Jehová saaʼu tü miichi aʼwaajüleekat sünain müin aka saaʼin siruma. Talatüsü naaʼin Jehová sutuma tü naainjakat na israelitakana. Shiyaleraapa tü sirumakat, nayaawata aaʼu na israelitakana noʼunajanain. Natsajüin tü miichi aʼwaajüleekat jee oʼunushii naya süchiirua tü sirumakat.