Oʼttushii nachikuaʼa na israelitakana sünain aʼwaajaa tü maleiwayaasükalüirua otta motushi Jehová naaʼin. Müliashii maʼin naya natuma na madianitakana soʼu akaratshi juya, naʼluwajüin namüʼlüin otta najaʼttirüin napünajüin. Ounjulaashii na israelitakana noulia saaʼu tü uuchikalüirua otta suluʼu koʼushii. Soʼu wanee kaʼi, nachuntaka kaalinwaa na israelitakana nümüin Jehová. Nuluwataaka Jehová wanee aapiee süpüla naashajaain nümaa Gedeón. «Nüneeküin pia Jehová süpüla puʼtteʼerüinjanain na israelitakana», nümaka chi aapieekai nümüin Gedeón. Nusoutaka Gedeón: «¿Jamüshi tayainjachikaʼa oʼtteʼerüin na israelitakana? Nnojoishi taya eʼnnaajünüin sutuma wayuu».

Nütüjawee aaʼu Gedeón shiimainre nüneekünüin nutuma Jehová. ¿Kasakaʼa naaʼinrüin? Niʼitaain wanee kuluutchon mmoluʼu, nümaka nümüin Jehová: «Chüʼrüle tapüla wattaʼa wattachon maalü kuluutkat tüü sümaa josoin tü mmakat, tatüjaweerü aaʼu tayain chi püneekakai süpüla toʼtteʼerüin na israelitakana». Waneemüin kaʼi, chüʼtsü nüpüla tü kuluutkat otta jososü tü mmakat. Nümaka joo nümüin Maleiwa: «Müleka shiale chüʼlüin tü mmakat jee josole tü kuluutkat, tatüjaweerü aaʼu tayain chi püneekakai». Ekeraajüsü tia nuchuntakat Gedeón nümüin Jehová. Makalaka nunoujain Gedeón nüneekünüin nutuma Jehová. Mapa, nükotchojirüin Gedeón na nusurulaatsekana süpüla nütkaainjachin namaa na madianiitakana.

 Nümaka Jehová nümüin Gedeón: «Takaalinjeena jia süpüla jükanajüin na madianiitakana, shiajaʼa neʼe wattain maʼin jaalii, anashii müleka naleʼejüle nachikuaʼa nepialuʼumüin na surulaat mmotkana suulia majüin nanüiki: ‹Akanajüshii waya süka wattain waalii›». Noʼunaka nepialuʼumüin 22.000 surulaat jee makataka 10.000 surulaat. «Wainmayülia maʼin wayuu pümaa, anashii müleka pümaale naya süpüla nasüin wüin chaa luwopuluʼumüin, naya püneeka na surulaat nnojoliikana ejepülaain sünain asaa wüin otta na eejakana aaʼin», nümaka Jehová. Eeshii neʼe 300 surulaat eejakana aaʼin. Nüküjain Jehová nümüin Gedeón nayamüleenain 135.000 surulaat madianita nakajee na 300 surulaat nümaakana.

Müshi Jehová nümüin Gedeón soʼu aikat tia: «Püshuta naaʼu na madianitakana». Naapaka Gedeón namüin na surulaatkana wanee suʼuwa paaʼa, amüchi otta wanee sikoʼu suluʼu tü amüchikat. «Jülüja jaaʼin tü taaʼinrajatkat, jüshataiwa tachiirua», nümaka namüin. Niʼyalajitka Gedeón tü suʼuwakat paaʼa, nüsottüin tü amüchikat otta yalejewaain müsü nutuma tü sikoʼukat jee nuʼwaataka: «Nüchajaruutse Jehová otta Gedeón». Müshiʼiya na nümaajanakana, aʼwaatüshii. Nainkuuka aaʼin na naʼünüükana, apantajaashii jee atkaajiraashii neʼe naya namaajiraa. Akanajuushii nachikuaʼa nutuma Jehová naʼünüü na israelitakana.