Aapüna achikit suluʼupünaa tü mmakat Canaán tü alatakat sümüin tü pueulokot Jericó. Yapajaka na aluwataaliikana saaʼu tia mmakat süpüla nashutuin saaʼu Israel. Akanasaʼa na gabaonitakana, naata tü kasa naaʼinrakat. Kasheʼinñaashii naya kuluulu ajaʼttaʼatasü jee noʼunaka eemüin Josué. «Suluʼujeejana waya wanee mma wattasü maʼin. Waapa achikit nünülia Jehová otta tü naaʼinrakat jüpüleerua chaa Egipto otta Moab. Müleka jüpansaajüle jünüiki wamüin nnojoleenain jushutuin waaʼu, jüchepchieena waya», namakalaka nümüin.

Nunoujain Josué nanüiki jee nüküjain namüin nnojoleenain nashutuin naaʼu. Apünüin kaʼi süchikijee tia, nütüjaa aaʼu Josué nnojoluin suluʼujeejanain naya wanee mma wattasü, suluʼujeejana naya tü mmakat Canaán. «¿Jamüshii jüküjakaʼa jaʼalain wamüin?», nümaka Josué namüin. Nasoutaka nümüin: «Mmotshii waya. Watüjaa aaʼuchi Jehová, chi Jümaleiwasekai nütkaain jüpüleerua. Nnojo juʼutuin waaʼin, jalia waya paaʼin». Nikeraajüin Josué nünüiki otta nuuʼulaain katüin noʼu na gabaoniitakana.

Sütüjaanapa saaʼu tü naaʼinrakat na gabaonitakana, oʼunushii jaʼraishii aluwataalii saaʼu Canaán namaa na nasurulaatsekana sünain ashutaa  naaʼu na gabaonitakana. Nuʼunaka Josué otta na nusurulaatsekana sünain akaalinjaa na gabaonitakana; siraasü aikat naaʼu süpüla nantüin chamüin. Oʼttushii naya sünain atkawaa waneemüin kaʼi, wattaʼajee maalü. Nayasaʼa na cananeokana, apantajaashii naya napüleerua. Sujunuwaaka naaʼu miyoʼuyuu shiʼichiise juya nutuma Jehová. Nuchuntaka Josué nümüin Jehová nüshaʼwalaainjachin chi Kaʼikai. ¿Jamüsü nuchuntaka Josué nümüin Jehová tia? Shia süka niʼitaain maʼin naaʼin nünain Jehová. Nüshaʼwalaaka chi Kaʼikai nutuma Jehová. Nnojoishi ekerotuin chi Kaʼikai waneʼereeya nakanajapa na israelitakana.