Kakaliaichi Moisés nekiipüʼüin na israelitakana, alüʼütsü nükalia süpüla outaa. «Nnojoluinjachi piain antirüin na israelitakana suluʼumüin tü Mma Anasü taapajatkat namüin. Teeʼiyateerü neʼe pümüin tü mmakat piʼraiwa shia», nümakalaka Jehová nümüin. Nuchuntaka Moisés nümüin Jehová nüneeküinjachin wanee nekiipüʼü na israelitakana süpüla naaʼinmajüin naya. «Paashajaa nümaa Josué otta püma nümüin niain chi taneekakai», nümaka Jehová nümüin.

Nüküjain Moisés namüin na israelitakana sülüʼülüin nükalia süpüla outaa jee nüneekünüin Josué nutuma Jehová süpüla nikiipüʼüin naya suluʼu tü Mma Anasükat. «Nnojo mmoluin pia, nükaalinjeechi pia Jehová», nümakalaka Moisés nümüin Josué. Nuʼunaka Moisés süraloʼumüin tü uuchikat Nebo. Niiʼiyataka Jehová nümüin chayaa tü mma nüküjakalü achiki paala nümüin Abrahán, Isaac otta Jacob. 120 nuuyase Moisés outapa nia.

Müshi Jehová nümüin Josué: «Pülata tü süchikat Jordán, püntaiwa Canaánmüin. Takaalinjeechi pia maʼaka takaalinjain Moisés. Paashajeʼera waneepia tü Tanüikikat, nnojo motuin paaʼin shia. Nnojo mmoluin pia jee yalayala paaʼin. Puʼuna maa jee paaʼinra süpüshuaʼa tü taluwataakalü anain pia».

 Nuluwataaka Josué piamashii ajayajülii suluʼumüin tü pueulokot Jericó. Sünain tü wanee ekirajaayakat, watüjaweerü aaʼu sooʼomüin süchiki tü alatakat chayaa. Naleʼejapa na ajayajüliikana Jericójee, naküjain anain maʼin süpüla nekerotuin Canaánmüin. Waneemüin kaʼi süchikijee tia, nuluwataaka Josué na israelitakana süpüla yapajüinjanain naya süpüla oʼunaa. Nuluwataaka palajana na sacerdote alüʼüjakana tü jurasükeetkat süpüla nalatüinjatüin tü süchikat Jordán. Asetüsü tü süchikat soʼu tia. Shiasaʼa nacholetapa shiroku tü wüinkat na sacerdotekana, ashaʼwalaasü tü süchikat. Nashaʼwalaaka pasanain sünain tü süchikat süpüla nalatüinjanain na israelitakana. Neʼrapa tia na israelitakana, ¿sotusüche naaʼin tü naaʼinrakat Jehová napüleerua wanaa sümaa nalatüin tü palaa Ishosükat?

Wainma juya chajanain na israelitakana isashiipaʼa, antüshii naya suluʼumüin tü Mma Anasükat. Aluʼujasaʼa jooluʼu, eeinnapa süpüla nakumajüin nepia, kepiain naya suluʼu pueulo, napünajüin jee kaʼttiain naya. Joutsü emiraa suluʼu tü mmakat Canaán, «wanee mma eeka aluʼu leechi otta mapa» münüsü shia.