Wanaa sümaa nantüin na piamashiikana ajayajülii Jericómüin, makatüshii naya shipialuʼu wanee wayuu Rahab münüsü. Nütüjaapa saaʼu tia chi aluwataakai saaʼu Jericó, nüjütüin nusurulaatse shipialuʼumüin Rahab. Suunjulaka Rahab na ajayajüliikana süraloʼu shipia. «Chapünaashii naya suluʼu tia wopukot», sümaka namüin na surulaatkana. «Takaalinjeena jia süka tatüjaain saaʼu naapeerüin jümüin Jehová mmakat tüü. Anasü jüpansaajüle jünüiki tamüin sünain nnojoleerüin juʼutuin saaʼin tapüshi», sümakalaka mapa namüin na ajayajüliikana.

«Lotusü wanüiki pümüin, müleka pükacherüle wanee jiiku ishosü soʼuluʼu tü wentaanakat, nnojoleena jamajüin na püpüshikana», namaka na ajayajüliikana sümüin Rahab. Talatakajasaʼa saaʼin Rahab sutuma tia ¿aashimüin?

Sükaalinjaka Rahab na ajayajüliikana, ashakatüshii naya shipialuʼujee süka tü jiikukat. Ounjulaashii naya saaʼu uuchi soʼu apünüin kaʼi. Antüshii naya mapa eemüin Josué. Süchikijee tia, nalatüin na israelitakana tü süchikat Jordán süpüla nashutuin saaʼu Jericó, tia shia tü palajatkat mma nashutuinjatkalü aaʼu. Nüküjain Jehová namüin naʼleeyatüinjatüin tü pueulokot Jericó  uwatua kaʼiwai. Naaʼinrüinjatü tia soʼu aipirua kaʼi. Shiasaʼa soʼu tü akaratshikat kaʼi, naʼleeyatüinjatü tia pueulokot akaratshitua sukua. Soʼu kaʼikat tia, emetutsü maʼin natuma na sacerdotekana shiʼira tü suʼuwakat paaʼa jee emetutsü maʼin nekiisa na surulaatkana. Sujuttaka süsepü Jericó; shia neʼe nnojotka ojuttuin eejatüle shipia Rahab. Oʼttaasü Rahab namaa na süpüshikana saaʼujee shiʼitaain maʼin saaʼin nünain Jehová.