Nia aikalaaka David sünain aluwatawaa saaʼu Israel outapa Saúl. 30 nuuyase soʼu tia. Soʼu wanee kaʼi, wanaa sümaa yalajachin nia nipialuʼu, niʼrüin iipünaajee wanee jierü anasüchon maʼin. Asakitshi David süchiirua, nütüjaaka saaʼu Bat-Sebain sünülia otta Urías nünülia chi suʼwayuusekai sümaa surulaalüin nia. Nüsaajitka David Bat-Seba, nüinkaaka sümaa, kachonka shia nümüin. Nuunjulajüin David tü naainjalakat. Nuluwataain chi süʼlaülakai surulaat süpüla niʼitaain Urías napüleerua na surulaatkana jee nüpütünüinjachin nümüiwaʼa. Oʼutuna aaʼinchi Urías sünain tia atkawaakat. Kasaatka mapa David sümaa Bat-Seba.

Niʼrüin Jehová süpüshuaʼa tü kasa mojusü naaʼinrakat David. ¿Kaseetche naaʼinraka Jehová? Nuluwataain wanee nünüikimaajachi kanüliakai Natán süpüla naashajaainjachin nümaa David. Müshi Natán nümüin David: «Eeshi wanee wayuu washirü watta maʼin saalii nümüʼlüin. Nuʼluwajüin naʼanneetse wanee wayuu, waneesüchon neʼe naʼanneetse». Jashichijaashi David saalinjee tü naainjakat chia wayuu washitchikai. «¡Anashi nuʼutunule aaʼin wayuukai chia!», nümakalaka nümüin Natán. Nusoutaka Natán nümüin. «Wayuukai chia pia piakai». Mojuka maʼin naaʼin David. «Kaainjalashi taya nuʼupala Jehová», nümaka nümüin Natán. Eʼrüshi müliaa David sümaa nüpüshi saalinjee naainjala otta süsalashi nia nutuma Jehová, ayatapajaʼa katüin noʼu David nutuma Jehová süka nnojoluin pülayaain naaʼin wanaa sümaa nüchiaanüin.

Nukumajeein David wanee miichi aʼwaajülee Jehová. Niapajaʼa Salomón, chi nüchonkai David nüneeküin Jehová süpüla niainjachin akumajüin tia aʼwaajüleekat. Oʼttushi David sünain akumajaa sukuwaʼipa tü kasa choʼujaakat süpüla nukumajüin Salomón mapa tü miichi aʼwaajüleekat. «Anainjatü maʼin  tü miichi aʼwaajüleekat Jehová. Jintüiyüiya Salomón, yapajüinjatü tatuma palajana tü kasa choʼujaakat süpüla sukumajünüin tü miichi aʼwaajüleekat», nümaka David. Naapüin David watta saalii nuwashirüin süpüla tü piichi aʼwaajüleekat. Nüchajaain nachiki na aʼyataalii atüjakana maʼin, akotchojüshi nia ooro, pülaata, otta wunuʼu anajüsü kanüliaka cedro chejee Tiro otta Sidón. Sülüʼütpa nükalia David süpüla outaa, naapüin nümüin Salomón wanee karaloʼuta sümaajatü shiyaakua tü miichi akumajünajatkat. Nümaka nümüin Salomón: «Nia Jehová aküjaka tamüin sukuwaʼipa sukumajia tü miichi aʼwaajüleekat, taapüinjatü shia pümüin. Piainjachi akumajaka shia. Nnojo mmoluin pia, nükaalinjeechi pia Jehová, yalayalaa paaʼin otta piʼyataa maʼin sünain».