Soʼu wanee kaʼi, müshi Jehová nümüin Samuel: «Puʼuna nipialuʼumüin Jesé. Taneeküin wanee wayuu naʼakajee na nüchonniikana Jesé süpüla nuluwataainjachin saaʼu Israel». Nüntapa Samuel nipialuʼumüin Jesé, niʼraka chi nüchon epayaakai. «Niainjaʼa aneekünüin chii», nümaka. «Nnojoishi niain taneeküin. Nnojotsü shiain jülüjain taaʼin tü shiʼrakat wayuu, shia jülüjaka taaʼin tü suluʼukat saaʼin», müshi Jehová nümüin Samuel.

Nuunejitka Jesé aipiruashii nüchonnii süpüla neʼraajüinjachin Samuel. «Nnojoishi yaain naʼaka chi nüneekakai Jehová. ¿Naya neʼe na püchonniikana naainnua?», nümaka Samuel. Nusoutaka Jesé: «Nnojo, ichaa chi emülieekai sünain arüleejaa anneerü, David nünülia». Shiasaʼa nüntinnapa David. «Chii, nia chi taneekakai», nümaka Jehová nümüin Samuel. Niʼyotoko Samuel seita saaʼu nikii David süpüla niainjachin aluwataain mapa saaʼu Israel.

Mapa, peʼipolooshii na israelitakana namaa na filisteokana. Eejachi wanee filisteo miyoʼu maʼin jee atüjashi maʼin atkawaa, Goliat nünülia. Nujuyaajüin Goliat na israelitakana kaʼiwai. «Jüntira tamüin wanee wayuu nütkaai tamaa. Nükanajüle taya, jüchepchieena waya. Jee takanajüle nia, wachepchieena jia», nümaka namüin.

Nüntaka David eejanale jutkatüin na surulaat israelitakana; eʼikajaashi nia neküin na nuwalayuukana. Naapaka joo David nünüiki Goliat. «Tayeechi atkaaka nümaa», nümaka David. Nusoutaka Saúl nümüin David: «Nnojo, jintüiyüiya pia». «Nükaalinjeechi taya Jehová», nümaka David.

Naapüin Saúl nümüin David tü nüsheʼin nütkaayakat. «Nnojo, nnojoleerü taʼatüin tanain, jawatüsü maʼin»,  nümaka David nümüin. Naapaain David wanee junaaya, nuʼunaka eemüin wanee luwopu. Nükotchojoko jaʼraisü ipa koʼoyoojusü, nünaajaaka shia suluʼu naaʼawalia. Nürütkaaka David nünainmüin Goliat. «Jalaichi toʼutai paaʼin. Shikaiwa pia tü wüchiikalüirua», nümaka Goliat nümüin David. Nusoutaka David sümaa nnojolin mmoluin nia: «Antüshi pia teʼipomüin sümaa chajaruuta jee jatü. Aluʼusaʼa tayakai, atkaainjachi taya pümaa sükajee nünülia Jehová. Nnojoishi atkaain pia wamaa, nia pütkaaka amaa Maleiwa. Natüjaweerü aaʼu napüshuaʼa na wayuu yaakana sünain pülashin maʼin Jehová suulialeʼeya wanee chajaruuta jee jatü. Naapeena jia wajapuluʼu».

Niʼitaaka David wanee ipa suluʼu tü nujunaayasekat jee nujutaka shia emetut maʼin nooʼomüin Goliat. «Tooj» niʼipoʼunain, «soj» nümaka mmoluʼumüin, outaleeshia Goliat. Lotusü maʼin tü ipakat nutuma Jehová. Neʼrapa tia na filisteokana, apantajaashii naya suulia noʼutunuin aaʼin. Niʼitaain maʼin naaʼin David nünain Jehová. ¿Jama piakai? ¿Piʼitaainche maʼin paaʼin nünain Jehová maʼaka naaʼin David?