Wainma kasa naapaka Jehová nümüin Salomón, kekiishi maʼin nia nutuma otta nukumajirüin nia tü aʼwaajüleekat. Akayalaashi Salomón mapa nuulia Jehová. Kachonle pia, püküja namüin nükayalaain Salomón nuulia Jehová natuma na aʼwaajakana maleiwayaasü. Piamasü mapa shiʼipapaʼa tü aluwataaya eejatkat Israel. Eejana aluwataalii mojulaashii ooʼuleʼerakana na israelitakana suulia naʼwaajüin Jehová otta naʼwaajirüin naya maleiwayaasü. Soʼu tia, müliashii maʼin atumawaa na nünüikimaajanakana Maleiwa jee oʼutuna aaʼinchii naya. Mojuleesia maʼin nakuwaʼipa na israelitakana sutuma Jezabel. Aainjünüsü maʼin kasa mojusü chaa Israel. Mayaainjeʼe sülatüin tia, eejana waneinnua israelita waneepiakana nümaa Jehová, maʼaka naaʼin Jehosafat chi aluwataaikai otta Elías chi nünüikimaajachikai Maleiwa.