Anasü nümüin Acab niyüüjase wanee wayuu kanüliakai Nabot. Niʼrawalin shia soʼuluʼujee shiwentaanase nipia. Niyaʼlajeein shia nuulia Nabot, nnojotka nuikeein Nabot tü niyüüjasekat süka nüpatsein shia natuma na wayuu kachonkana nia. Naashin Jehová nnojotsü noikajatüin na israelitakana wanee napatse. Anasü tü naaʼinrakat Nabot. ¿Kojutusüche nümüin Acab tü nukuwaʼipakat Nabot? Nnojo, jashichijaashi neʼe nia sünainjee. Nnojoishi nia eküin otta mojuʼitüinsai nipialuʼujee sutuma jashichin maʼin nia.

Jezabel sünülia tü nuʼwayuusekat Acab, mojulaasü maʼin shia. Müsü sünüiki nümüin Acab: «Pia chi aluwataakai saaʼu Israel, eesü süpüla pümaʼanain tü keeʼireekat paaʼin. Tachajaweerü sukuwaʼipa süpüla taapüin pümüin tia yüüjakat». Süshajaka wanee karaloʼuta namüin na laülaashii chajanakana Israel. Tia karaloʼutakat süpülajatü naʼalainpalainjachin Nabot. Naküjainjatü süchiki mojuluʼuluin nünüiki Nabot nümüin Jehová süpüla niʼinaʼannüin süka ipa otta nuʼutunuin aaʼin. Oonooshii na laülaashiikana sümaa sünüiki Jezabel. «Outuitchipa Nabot, paapa maala tü yüüjakat», sümaka Jezabel nümüin Acab.

Oʼutinnaa aaʼinchi Nabot sutuma Jezabel eereje wayuuin anamia nia. Wainma na wayuu aikana apüla Jehová suʼutiraka aaʼin Jezabel. Mojulaasü maʼin shia otta suʼwaajüin na maleiwayaashiikana. Niʼrüin Jehová süpüshuaʼa tü kasa mojusü saaʼinrakat. ¿Kasa naaʼinrüinjatka Jehová süka Jezabel?

Outapa Acab, nia aluwataaka nüchikumüin Jehoram chi nüchonkai. Nuluwataain Jehová wanee wayuu Jehú münüshi süpüla kasalajanain saainjala Jezabel sümaa süpüshi.

Oʼunushi Jehú saaʼu neʼejena Jezreelmüin, eejatüle kepiain Jezabel. Müshia Jehoram oʼunushi saaʼu neʼejena süpüla naashajaain nümaa Jehú. Shiasaʼa nüpanapajapa nia Jehoram, «¿eesü jimataa aaʼin?», müshi nia nümüin Jehú. Nusoutaka Jehú: «¿Jamüsü eeinjatka jimataa aaʼin sümaa saaʼinrüin  kasa mojusü Jezabel, tü püikat?». Nujununteʼerüin neʼejena Jehoram süpüla nüleʼejaain nüchikuaʼa, nütkaka nia Jehú süka najatüin, outakalaka nia.

Nuʼunaka joo Jehú eejatüle kepiain Jezabel. Wanaa sümaa saapüin Jezabel nüntajachin Jehú, ashajaasü sümaa shipeinajüin suʼwala. Saʼatapajüin nia süʼütpaʼa wanee wentaana, iipünaa sünain shipia. Nüntapa Jehú, airuʼutsü maʼin sünüiki niʼipajee. «Jujuta süchiki iipünaajee», nümaka Jehú namüin na süchepchiakana. Ojutunusü süchiki iipünaajee. «Sooj» sümaka mmoluʼumüin, outaleeka shia.

Mapa, nuʼuta aaʼinchii Jehú 70 nüchonnii Acab otta najaʼlajeʼerüin tü aʼwaajaakat Baal. ¿Kasa pütüjaka sünainjee tü alatakat? Niʼrüin Jehová süpüshuaʼa tü alatakat otta kasalajanasü saainjala wayuu mojulaasü nutuma.