Jehosafat nia wanee wayuu aluwataapuʼushi saaʼu Judá, najaʼttiraka tü aʼwaajüleekat Baal otta tü maleiwayaasükalüirua. Keeʼireesü naaʼin Jehosafat sütüjaanüin aaʼu tü nuluwataakalü anain Jehová. Müshiijeseʼe nuluwataain na niʼipajanakana otta na levitakana süpüla nekirajüinjanain na wayuukana süchiki tü nuluwataakalü anain Jehová.

Nnojoishii ashutuin naaʼu na wayuu pejekana nanain süka natüjaain saaʼu eein Jehová namaa na israelitakana otta mmotshii naya seema tü nüpülainkat. Eejana na asülajakana kasa nümüin Jehosafat. Soʼu wanee kaʼi, na moabitakana, na ammonitakana otta waneinnua wayuu chajanaka suluʼu tü mmakat Seír, paaʼinwashii naya shikiira nashutuin saaʼu Judá. Nütüjaa aaʼu Jehosafat niainjachin Jehová chi akaalinjakai nia. Nuutkajeʼeraka napüshuaʼa na wayuukana chaa Jerusalén, eejana tooloyuu, jieyuu otta tepichi. Nuchuntaka Jehosafat nümüin Jehová noʼupala. «Jehová nnojoishii süpüla wakanajüin na waʼünüükana nnojoire eein pia wamaa. Püküja wamüin tü waaʼinrüinjatkat», nümaka.

Naapüin Jehová nünüiki Jehosafat otta asoutushi niʼipajee: «Nnojo mmoluin jia, tayeechi akaalinjaka jia. Juʼuna sünain tü atkawaakat, jimata neʼe jia jiʼreetka tü taaʼinrüinjatkat süpüla toʼtteʼerüin jia». ¿Kasache naaʼinrüinjatka Jehová süpüla nuʼtteʼerüin naya?

Waneemüin kaʼi, nüneeküin Jehosafat eeʼirajülii otta nuluwataain naya palajana napüleerua na surulaatkana. Ojuʼitüshii naya Jerusalénjee süpüla nantiraainjanain namaa na naʼünüükana suluʼu wanee mma Tecoa münüsü.

Talatüshii maʼin na eeʼirajüliikana sümaa neeʼirajüin süka süpüshuaʼa naaʼin nümüin Jehová. Nia Jehová atkaaka süpüleerua nupueulose. Nütkeʼerüin Jehová na naʼünüükana. Outushii naya napüshuaʼa. Akanasaʼa na wayuu chejeʼewaliikana Judá, na sacerdotekana otta na eeʼirajüliikana nnojoishii naya jamajüin süka naaʼinmajüin naya Jehová. Napüshuaʼa na kepiakana pejepünaa nanain, naapüin süchiki tü kasa naaʼinrakat Jehová. Nayaawata aaʼu ayatüin naaʼinmajüin Jehová tü nupueulosekat noulia na naʼünüükana. ¿Kasa naaʼinraka Jehová süpüla nuʼtteʼerüinjatüin nupueulose? Watta saalii sukuwaʼipa nutuma Jehová, nnojotsü choʼujaain nuchuntuin kaalinwaa sümüin wayuu.