Wanaa sümaa saapüin Jezabel sünain noʼutunuin aaʼin na nünüikimaajanakana Baal, jashichisü maʼin shia. Suluwataaka wanee pütchi nümüin Elías, müsü mayaa: «Outeerü piaʼata wattaʼa maʼaka puʼutuin naaʼin na nünüikimaajanakana Baal». Mmotkalaka maʼin naaʼin Elías naapapa tia pütchikat jee nuʼluwataaka isashiipaʼamüin. «Jehová, keraashi taya yaapünaa. Anashi mata outule taya», nümaka nümüin Jehová. Sutuma mapüsain maʼin Elías, atunkushi nia seemioushi nuuʼulia wanee wunuʼu.

Nüntaka wanee aapiee nünainmüin Elías. Achijinnüshi Elías nutuma. «Pütamaa, pika maa», nümaka nümüin. Niʼraka Elías wanee pan saaʼujatü wanee ipa jee müsia wanee jaarü sümaa wüin. Nikaka Elías sümaa nüsüin tü wüinkat. Süchikijee tia, atunkushi nia nüchikuaʼa. Nüchijiraka nia nüchikuaʼa chi aapieekai. «Pika maa. Acheküshi emirain pia süka wattayülüin wopu püpüleerua», nümaka chi aapieekai nümüin. Wainma maʼin niküin Elías. Oʼuna müshia nia 40 kaʼi jee 40 ai. Nüntaka eemüin tü uuchikat Horeb. Nikerotoko suluʼu wanee koʼushii sünain atunkaa. «¿Jamüshi pia yaaka yaʼayaa Elías?», nümaka Jehová nümüin. Nusoutaka Elías: «Nnojotsü nekeraajüin na israelitakana tü namakat pümüin. Najaʼlajeʼerüin tü aʼajüleekat mürüt pümüin otta noʼuta aaʼinchii na pünüikimaajanakana. Otta achajaana achikichi taya süpüla oʼutunaa aaʼin».

«Pujuʼita suluʼujee tü koʼushiikat jee püshaʼwalaa süʼütpaʼa tü uuchikat», nümaka Jehová nümüin Elías. Katsüinjaasü joo tü joutaikat, sukutkujaaka tü mmakat jee suchuwajaaka wanee siki. Naapaka Elías wanee pütchi. Nuunjutka nuʼupünaa süka nüsheʼin sümaa shaʼwatüin nia soʼuluʼu tü koʼushiikat. Asakinnüshi nia nutuma Jehová jamüin nuʼluwataaka. «Taya neʼe kataka oʼu naʼakajee na pünüikimaajanakana», nümakalaka Elías. Nusoutakalaka Jehová nümüin: «Nnojoishi pia pümüiwaʼain. Eeshii 7.000 wayuu chaa Israel aʼwaajaka taya. Puʼuna eemüin Eliseo, püküja nümüin taneeküin nia süpüla tanüikimaainjachin, niainjachi püchikumüinka». Oʼunaajaa nümüin Elías sünain aaʼinraa tü nümakat Jehová nümüin. ¿Nükaalinjeeiche pia Jehová müleka poonoole sümaa nünüiki? Jamüsüsaʼa shia. Jooʼu wekirajaai sünain tü alatakat soʼunnaa nnojoluin süʼitüin tü juyakat.