Saʼakajee tü poloosükat eʼirukuu chaa Israel, eejana wainma aluwataalii mojulaakana maʼin. Eejachi wanee aluwataai mojulaakai maʼin Acab nünülia. Nuʼwayuusesü wanee jiet mojulaasü otta aʼwaajaka Baal. Jezabel sünülia, shiakat nümaa Acab naʼwaajirüin na israelitakana Baal jee noʼuta aaʼinchii wainma nünüikimaajana Jehová. ¿Kasakaʼa naaʼinrüin Jehová? Nuluwataain Elías chi nünüikimaajachikai süpüla nüküjain wanee pütchi nümüin Acab.

Nüküjain Elías nümüin Acab maʼitüinjatüin tü juyakat Israel saalinjee mojulaain Acab. Alatüsü suulia apünüin juya maʼitüin tü juyakat, jososü mmapaʼakat jee aisü maʼin jamü. Nuluwataanaka mapa Elías nutuma Jehová süpüla naashajaain nümaa Acab. «Eʼrüi maʼin pia wayumüin. Pia kasitka tü alatakat wamüin», nümaka Acab. Nusoutaka Elías: «Nnojoishi tayain kasirüin nnojoluin süʼitüin tü juyakat. Maʼitüinsat tü juyakat sutuma puʼwaajüin Baal. Puutkajeʼera na israelitakana saaʼu tü uuchikat Carmelo piʼraiwa tü alatajatkat chayaa».

Nümaka Elías noutkajaapa na israelitakana saaʼu tü uuchikat: «Tamüshii paala jia, müleka niale Jehová chi Maleiwa shiimainshikai, niainjachi juʼunaka achiirua jee nialeje Baal, nieechi mata juʼunaka achiirua. Anuu tü aainjünajatkat: Na 450 nünüikimaajanakana Baal noʼutuinjachi aaʼin chi paaʼachonkai jee achuntajana nümüin chi namaleiwasekai. Akaʼaya tayakai, toʼuteechi aaʼin wanee paaʼachon jee achunteechi taya nümüin Jehová. Niasaʼa chi maleiwa achuwajeʼerakai siki iipünaajee süpüla jotuin tü asülajuushikat, atüjaaneechi aaʼu niain chi Maleiwa shiimainshikai». Anasü tia namüin na israelitakana.

Noʼuta aaʼinchi chi paaʼachonkai na nünüikimaajanakana Baal. Siraasü kaʼi naaʼu sünain achuntaa nümüin chi namaleiwasekai. «Baalkalee, pusouta maa wamüin», müshii naya. Shiasaʼa süka nnojoluin nusoutuin Baal, meeʼerapalashi nia nutuma Elías: «Juʼwaata emetut, kamaʼa nusouteechin. Atunkushi ee nia, achijinneeshi nia» nümaka. Motsosü kaʼi naaʼu na nünüikimaajanakana Baal sünain achuntaa, nnojoishi jaralin asoutuin namüin.

Niasaʼa Elías, niʼitaain chi paaʼachonkai saaʼu tü aʼajüleekat otta niʼyotuin miyoʼu wüin saaʼu. Nuʼuraajaka nümüin Jehová: «Jehovákalee, pusouta maa, shiʼraiwaʼaya tü wayuukalüirua piain chi Maleiwa shiimainshikai». Suchuwajaaka siki iipünaa jee nutuma Maleiwa, jotoko chi paaʼachonkai. Naʼwaataka na wayuukana: «¡Niaʼaya Jehová chi Maleiwa shiimainshikai!».  Nümaka Elías: «Jütaʼüla napüshuaʼa na nünüikimaajanakana Baal, jalia isajayaai wanee juulia». Soʼu kaʼikat tia, oʼutuna aaʼinchii 450 na nünüikimaajanakana Baal.

Eejaʼalaa müsü joo mapa wanee sirumachon iipünaa saaʼu tü palaakat. «Isee wanee juya miyoʼu maʼin. Poʼotoo saaʼu peʼejena puʼunamaatai pipialuʼumüin», nümaka Elías nümüin Acab. Kojosü maʼin tü sirumakat otta katsüinsü joutaikat, kaʼülishaatasü tü juyakat soʼu tia. Nuwataaka Elías sümaa kawachirain maʼin nia nutuma chi naaʼinkai Maleiwa, nülaneʼeraka neʼejena Acab. ¿Ajaʼttüsüche yalapünaa tü kasa mojusü alatakat nümüin Elías?