Ashutushi chi aluwataaikai Asiria saaʼu tü poloosükat eʼirukuu chajatkat Israel. Ashuteeshi joo nia saaʼu tü pueulo chajatkat Judá. Akanajuusü nutuma süpüshuaʼale tü mma chajatkat, shia neʼe choʼujaaka nüpüleerua Jerusalén otta nushutee aaʼulu shia. Nnojotpajaʼa nütüjaain saaʼu Senaquerib naaʼinmajüin Jehová tia pueulokot.

Watta saalii nneerü nuwalaajaka Ezequías nümüin Senaquerib süpüla nnojoluin nushutuin saaʼu Jerusalén. Naʼalainpalashii naya Senaquerib, naapaain tü nneetkat jee nuluwataain na nusurulaatsekana süpüla nashutuin saaʼu Jerusalén. Mmotsü maʼin tü wayuukalüirua natüjaapa saaʼu pejein na asiriokana. «Nnojo mmoluin jia neema na asiriokana, nükaalinjeena waya Jehová süpüla wakanajüin naya», nümakalaka Ezequías namüin.

Nuluwataain Senaquerib wanee nünüikimaajachi, Rabsaqué münüshi süpüla nimeeʼerainpalain na wayuu chajanakana Jerusalén. Yalajachi shaʼwatüin Rabsaqué anuuipaʼa süʼütpaʼa süsepü Jerusalén. «Nnojoishii süpüla nükaalinjain jia Jehová, jalia nimeejayaai jaaʼin Ezequías. Nnojoishi eein wanee maleiwa eekai süpüla naaʼinmajüin jia woulia», nümaka sümaa emetuluin nünüiki.

«¿Kasa anaka süpüla taaʼinrüin?», nümaka Ezequías nümüin Jehová. Nusoutakalaka Jehová nümüin: «Nnojo mmoluin pia sutuma nünüiki Rabsaqué. Nnojoleechi ashutuin Senaquerib saaʼu Jerusalén». Suluwataanaka wanee karaloʼuta nümüin Ezequías nutuma Senaquerib, anuu nünüiki suluʼu: «Jaapa shikii tü pueulokot, nnojoleena jia eejiraain wamaa, nnojoleena naaʼinmajüin jia Jehová». Nuchuntaka Ezequías nümüin Jehová, müshi nia: «Jehová, puʼtteʼera waya noulia, sütüjaaiwa saaʼu wayuu süpüshuaʼa piain neʼe chi Maleiwa shiimainshikai». Nusoutaka Jehová nümüin: «Nnojoleechi ekerotuin chi aluwataashikai saaʼu Asiria suluʼumüin Jerusalén. Taaʼinmajeerü tü tapueulosekat».

Nuʼunakalaka Senaquerib süpüla nushutuin saaʼu Jerusalén. Ashutuinjachia nia naaʼinruʼu saaʼu tia mmakat. Shiasaʼa soʼu wanee ai, nuluwataain Jehová wanee aapiee süpüla  najaʼttirüinjanain na surulaat asiriokana. ¡Outushii 185.000 surulaat nutuma wanee aapiee nümaʼanajeejachi Jehová! Nüleʼejaka Senaquerib nüchikuaʼa nuumainpaʼamüin süka nükanajuuin. Shia naaʼinraka Jehová tia süpüla nükaalinjain Ezequías otta süpüla naaʼinmajüin Jerusalén, nikeraajüin Jehová tü nünüikikat. Pialeje chain Jerusalén, ¿piʼitaainje maʼin paaʼin nünain Jehová?