Eejatü wanee mma kanüliaka Nínive, mojulaasü maʼin tü wayuukalüirua suluʼu tia mmakat. Jonás nünülia chi nünüikimaajachikai Maleiwa, nuluwataain nia Jehová süpüla naapirüin na wayuukana süpüla nayaawajaain suulia naainjala. Niasaʼa Jonás nnojoishi jaa müin, oʼunushi neʼe nia suluʼu wanee anuwa süpüla nüntajachin suluʼu wanee mma Tarsis münüsü.

Wattashi Jonás suluʼu tü anuwakat, süʼitaka wanee juya miyoʼushaata wawaimaajatü, ayoʼujaasü maʼin naaʼin na anuwapüʼükana, achuntushii naya namüin na namaleiwasekana. «¿Kasanainjeeshii maka waya?», namakalaka. Nusoutaka Jonás: «Taya kasitka. Oʼunushi taya süka nnojoluin taainjeein tü nuluwataakalü anain taya Jehová. Anashi jujutule taya shiroku tü palaakat, shiimalaajeetka». Nnojoishi nojuteein Jonás shiroku tü palaakat na anuwapüʼükana. Macheʼesai Jonás süchiirua nünüiki. Nujutunaka Jonás shiroku tü palaakat, shiimalaaka.

«Outushi müin taya», mataashi Jonás nüleʼeruʼu. Nimerotopa shiroku tü palaakat, achuntushi nia nümüin Jehová, eejaaka wanee jime miyoʼushaata nutuma Jehová, shimiratka nia, nnojoishi outuin nia sutuma. Nuchuntaka Jonás nümüin Jehová süleʼeruʼu tü jimekat: «Jehová taapüin tanüiki pümüin jooluʼu, nnojoleechi moonooloin taya sümaa pünüiki piantua». Katüsü noʼu Jonás nutuma Jehová apünüin kaʼi süleʼeruʼu tü jimekat. Seetaka Jonás tü jimekat mapa sotpaʼa tü palaakat.

Oʼttaashi Jonás nutuma Jehová. ¿Müichiaka moʼunuin nia Nínivemüin suluʼujee tia? Nnojo. Nuluwataain nia Jehová nüchikuaʼa Nínivemüin, noonooka  sümaa nünüiki. «Najaʼttirüinjatü Jehová tü pueulokot Nínive soʼu 40 kaʼi», nümakalaka sümüin tü wayuu mojulaasükalüirua. Nnojotka sülatüin tü kasa niʼreekalü amüin. Ayaawajaashii na ninivitakana suulia naainjala sümaa naʼwanajaain nakuwaʼipa. «Juchunta maʼin nümüin Maleiwa otta jiyaawajaa suulia jaainjala, kamaʼa nnojoleenain wajaʼttinnüin nutuma», nümaka chi aluwataaikai saaʼu Nínive sümüin tü wayuukalüirua. Nnojotsü najaʼttirüin Jehová tü wayuukalüirua süka nayaawajaain suulia naainjala.

Jashichika maʼin Jonás sünainjee tia. Jülüja paaʼin tü naaʼinrakat Jehová. Nnojoishi nia aashichijaain nümüin Jonás otta amülialaasü naaʼin naalin, niasaʼa Jonás nnojotsü amülialaain naaʼin saalinjee tü wayuukalüirua. Ojuʼitüshi Jonás suluʼujee tü pueulokot, nüikalaaka mamüin aka tüsa seemioushi wanee suuʼulia wüüirü, jashichishi neʼe nia süka nnojoluin kasain alatüin. Jutkalaka suuʼulia tü wüüitkat, jashichireeshia Jonás sünainjee tia. «Mojusü neʼe paaʼin saalinjee tü suuʼuliakat wüüirü, nnojotsü amülialaain paaʼin saalinjee tü wayuuirua yaakat Nínive. Amülialaasü taaʼin naalin, makaʼa nnojoliin tajaʼttirüin naya», nümaka Jehová nümüin. ¿Kasache nüküjeeka Jehová nümüin Jonás? Tü nüküjeekalü achiki Jehová shia kojutuleein tü wayuuirua chajatkat Nínive suulia wanee suuʼulia wüüirü.