Nnojotsü keeʼireein naaʼin Satanás ooʼulaka tü yolujaakalüirua piʼyataain nümüin Maleiwa. Nachajaain sukuwaʼipa nakayaleʼerüin na wayuukana nuulia Maleiwa. ¿Jamüsü sukuwaʼipa natuma? Wanee sukuwaʼipa shia süka tü iküleesia nnojotkat shiimain (2 Corinto 11:13-15). Nnojotsü shikirajüin tü shiimain suluʼukat tü Wiwüliakat. Müsü aka saaʼin wanee nneerü eeka nnojoluin shiimain: Müsü shiimainkai saaʼin akatsaʼa mojutuin shia. Otta eesü süpüla mojuin pukuwaʼipa sutuma.

Tü iküleesia nnojotkat shiimain nnojotsü sütalateʼerüin naaʼin Jeowa, chi Maleiwa nnojoikai aküjüin alawaa. Wanaa sümaa yaajachin Jesús saaʼu tü Mmakat, oʼutunee aaʼinchi natuma na ekirajüliikana suluʼu iküleesia. Naya aʼwaajaka Maleiwa süka tü shiimainkat naashin. Mapuʼusü nanüiki: «Weʼraajüin chi Washikai, nia chi Maleiwakai nümüiwa». Akatsaʼa ¿nücheküin Jesús tia? Nnojo. Müshi nia namüin: «Shia jaaʼinreeka maʼi tü kasa mojusü nüchekakat jüpüleerua chi sülaülakai yolujaa, süka niain shiimüin jüshin» (Juan 8:41, 44). Wainma wayuu maaʼulu aʼwaajaka Maleiwa naashin, akatsaʼa chi naʼyataakai maʼin amüin nia Satanás otta tü yolujaakalüirua (1 Corinto 10:20).

 Maʼaka mojuin nüchon wanee wunuʼu ittüshi müsia tü wayuu suluʼukat tü iküleesia nnojotkat shiimain aainjüshii kasa mojusü. Wainma kasa mojusü saaʼu tü Mmakat sutuma tü mojulaasükalüirua. Eesü akuwaʼipaa yarüttüsü, atkawaa, aʼluwajaa, müliaa atumaa, oʼutaa saaʼin wayuu ooʼulaka eʼraa wayumüin. Watta naalii na aainjakana tüü sümaa suluʼuin naya wanee iküleesia, akatsaʼa tü iküleesia kaluʼukat naya nnojoishii saainjirüin kasa anasü. Nnojoishii süpüla naʼaleewain naya Maleiwa aluʼusaʼa nooʼulaale suulia aainjaa kasa mojusü (Mateo 7:17, 18).

Tü iküleesia nnojotkat shiimain shikirajüin tü wayuukalüirua sünain aashajawaa sümaa tü ayaakuaa aʼwaajünakat. Naashin Maleiwa nnojoluinjana waya aashajaain sümaa tü ayaakuaa aʼwaajünakat. Shiimain tia. ¿Anasüche pümüin naashajaale wanee wayuu sümüin piyaakua ooʼulaka nnojorüle naashajaain pümaa? ¿Eeshi süpüla paʼaleewain nia? Nnojo. Keeʼireesü naaʼin Jeowa saashajaain tü wayuukalüirua nümaa nnojotsü shiainjatüin süka wanee ayaakuaa (1 Juan 5:21; Aluwataaushikana 17:29).

Eesü süpüla suʼutunuin saaʼin wayuu sünain atkawaa saashin tü iküleesia nnojotkat shiimain. Na naʼaleewainkana Maleiwa aijiraainjana naashin Jesús. Aire wapüla wanee wayuu nnojotsü woʼutuin saaʼin (Juan 13:35). Nnojotsü anain oʼutaa saaʼin wayuu mojulaasü. Wanaa sümaa nütaʼünüin Jesús natuma na nüʼünüükana, nüchiajaain na nikirajüinkana suulia natkaain nünainjee (Mateo 26:51, 52).

Müliainjatü tü mojulaasükalüirua pasanain sünain siki saashin tü iküleesia nnojotkat shiimain. Saashin tü Wiwüliakat ouktusü wayuu sutuma saainjala (Roma 6:23). Jeowa nia wanee Maleiwa aipürai. ¿Eesüche süpüla müliain maʼin tü wayuukalüirua nutuma wanee Maleiwa aipürai? Nnojo. Waneesüinjatü müleʼe tü iküleesia eeinjatkat suluʼu tü Paraiisükat, shiainjatü tü iküleesia nüchekakat Jeowa (Alateetkat Mapeena 15:4). Süpüshuaʼa tü wanee iküleesiakalüirua ekirajaka naʼalain Satanás ajaʼlajeʼennüinjatü.