Tü kasa mojusü alatakat saaʼu tü Mmakat shiiʼiyatüin sülüʼülüin tü Paraiisükat. Saashin tü Wiwüliakat, süpülapünaa tü Paraiisükat weʼrüinjatü kaʼi kapüleesü. Kepiashii waya soʼu kaʼikat tia. Tüüirua shia süpüshi tü alatajatkat saashin tü Wiwüliakat:

Watta saalii atkawaa. «Atkaajiraajeerü wayuu sainküin mmakat süpüshua.» (Mateo 24:7.) Ashajuushikat tüü ekeraajüsü. Soʼujee tü juyakat 1914 eeirü piamasü atkawaa keemasü maʼin otta waneeirua. Wainma wayuu ouktusü sünain.

Wainma ayuulii saaʼu tü mmakat süpüshuaʼa. «Mülieerü maʼi saaʼin wayuu sütüma [...] ayuulii sainküin mma» (Lucas 21:11). ¿Ekeraajüsü ayaawaseekat tüü? Aa. Tü ayuulii sünainpünaakat waaʼin, kanset, kamüsoina, tü poloona aisükat, sida ooʼulaka waneeirua ayuulii ouktusü maʼin wayuu sutuma.

Aisü shiiʼiree eküülü. Suluʼupünaa tü mmakat eeshii wayuu eeka nnojoluin wainmain eküülü namaʼana. Soʼu juyaka süpüshuaʼa wainma wayuu ouktaka sutuma jamü. Shia wanee shiyaawase sülüʼülüin tü Paraiisükat. Müsü tü Wiwüliakat: «Mülieerü maʼi saaʼin wayuu sütüma jamü» (Marcos 13:8).

 Akutkujaasü maʼin tü mmakat. «Akutkujaweerü tü mmakat sainküin mma.» (Mateo 24:7.) Tüü, ekeraajüsü soʼu wakalia. Soʼujee tü juyakat 1914 wainmairü wayuu ouktusü sutuma sukutkujaain maʼin tü mmakat.

Wayuuirua mojulaasü. «Eejeerü wainma wayuu eekai kapülain naaʼin nakuaippa neʼe namüiwa» ooʼulaka «eekai kachiiruain naaʼin tü washirüükat». «Eekai moonooloin sümaa nanüiki nashi je nei». «Je eekai shaitteein waneepia saaʼu maalin Maleiwa napüla» (2 Timoteo 3:1-5). ¿Nnojotsü müin saaʼin pümüin sukuwaʼipa tü wayuukalüirua maaʼulu? Nnojoishi kojutuin Maleiwa namüin ooʼulaka müliashii natuma na ekirajaweekana nünain.

Kaainjalaa. Otta müsia «kooʼomüinjeerü wayuu kaainjarat sainküin mmakat» (Mateo 24:12). Eesü pütüjaale saaʼu saainjünüin maʼin kasa mojusü maaʼulu. Sainküin tü mmakat, eesü süpüla shimeejünüin, saainjünüin kasa mojusü otta suʼluwajünüin tü kasa namaʼanakat na wayuukana.

Süpüshuaʼa tüü, shiiʼiyatüin sülüʼülüin Nuluwataaya Maleiwa. Müsü tü Wiwüliakat: «Akaʼaya jiʼrapeena tü taküjaitpakat achiki jümüin, jütüjaweerü aaʼu sünain sülüʼülüin nükalia Maleiwa süpüla aluwatawaa» (Lucas 21:31). Akatsaʼa ¿kasa tü Nuluwataayakat Maleiwa? Shia tü nuluwataaya sirumatuʼujeʼewatkat paraiisüinjatka atuma tü Mmakat. Shia eeinjatka suulia suluwataaya wayuu (Daniel 2:44).