Jesucristo Nüchon Jeowa, nia chi naʼaleewainkai maʼin. Süpülapünaa wayuuin Jesucristo saaʼu tü Mmakat, chapuʼushi sirumatuʼu maʼaka naaʼin wanee meʼrujusai pülashi (Juan 17:5). Süchikijee nüntaka mmapaʼamüin süpüla ekirajaa wayuu sünain tü shiimainkat nüchiki Maleiwa (Juan 18:37). Jee müsia, ouktushi nia süpüla nükaaliinjüin na wayuu jaa makana suulia tü ouktaakat otta tü kaainjalaakat (Mateo 20:28). Aluwataashi nia maaʼulu suluʼu Nuluwataaya Maleiwa, wanee aluwataaya sirumatuʼujeʼewalü paraiisüinjatka atuma tü Mmakat (Alateetkat Mapeena 19:16).

Naʼaleewain Maleiwa na aapieekana. Na aapieekana [anjetkana] nnojoishii wayuuin paala, nukumajüin naya Maleiwa chaaʼaya sirumatuʼu süpülapünaa nukumajüin tü Mmakat. (Job 38:4-7). Wattashaata maʼin saalii tü aapieekalüirua (Alateetkat Mapeena 5:11). Ooʼulaka keeʼireesü naaʼin sütüjaainjatüin tü wayuukalüirua saaʼu tü shiimainkat nüchiki Jeowa (Alateetkat Mapeena 14:6, 7).

Kaʼaleewainshi Maleiwa saaʼu tü Mmakat, nanülia nutuma aküjülii pütchi nüchiki. Wanee wayuu eekai nuʼunuin suluʼumüin wanee laülaapia süpüla nüküjüin süchiki wanee kasa, shia nüküjaka achiki tü nütüjaakat aaʼu nüchiki wanee wayuu shiale wanee kasa. Na aküjüliikana pütchi nüchiki Jeowa aashajaashii nüchiki otta süchiki tü naainjeekat süpüleerua wayuu (Isaías 43:10). Maʼaka naaʼin na aapieekana, na Aküjüliikana pütchi nakaaliinjeein pia süpüla pütüjaain saaʼu tü shiimainkat nüchiki Jeowa. Keeʼireesü naaʼin nayakana aleeweein pia nümaa Maleiwa.