Tü ouktaakat shia nnojorüle katüin soʼu wayuu. Müsü aka saaʼin sutunkule maʼin wanee wayuu (Juan 11:11-14). Na ouktushiikana nnojoishii süpüla naapüin pütchi, naashajaain, neʼrüin otta kanain naaʼin wanee kasa (Eclesiastés 9:5, 10). Saashin tü iküleesia nnojotkat shiimain na ouktushiikana oʼunushii suluʼumüin saaʼinpülee tü ouktusükalüirua süpüla chainjanain naya namaa napüshi. Akatsaʼa tia nnojotsü shiain tü shikirajakat anain tü Wiwüliakat.

Nnojoishii süpüla nakaaliinjüin otta naainjüin kasa mojusü wamüin na ouktushiikana. Wainma wayuu aainjaka ooʼulaka aapakana kasa namüin na ouktushiikana süka anain shia namüin na ouktushiikana naashin. Akatsaʼa nnojotsü anain nümüin Maleiwa süka sünainjeein shia wanee naʼalain Satanás. Otta müsia nnojotsü anain namüin na ouktushiikana süka nnojoluin katüin noʼu. Nnojoluinjana waya mmoluin neema ooʼulaka waʼwaajüin na ouktushiikana. Nia neʼe Maleiwa waʼwaajüinjachika (Mateo 4:10).

Katüinjatü noʼu nachikuaʼa na ouktushiikana. Nüchijireena Jeowa mapeena na ouktushiikana süpüla kepiainjanain naya suluʼu tü Mma paraiisüinjatkat. (Juan 5:28, 29; Aluwataaushikana 24:15). Eesü süpüla nüchijireʼerüin Maleiwa na ouktushiikana maʼaka eein süpüla püchijirüin wanee wayuu eeka sutunkuin (Marcos 5:22, 23, 41, 42).

Katüin soʼu wayuu süchikijee ouktaa nnojotsü shiimain, naʼalain Satanás chi Yolujaakai. Satanás otta tü yolujaakalüirua neʼitaain suluʼu nekii na wayuukana nnojoluin ouktuin naaʼin na ouktushiikana ooʼulaka nayain eeka atuma tü ayuuliikat otta waneeirua kasa mojusü. Nimeejüin Satanás tü wayuukalüirua süka lapü jee kasa eeka shipeijaain. Makalaka nnojoluin anain nümüin Jeowa na achajaakana sukuwaʼipa aashajawaa namaa na ouktushiikana (Deuteronomio 18:10-12).