Aleewaa nümaa Maleiwa anashaatasü maʼin. Niiʼiyateerü Maleiwa pümüin tü pukuwaʼipainjatkat süpüla talatüin pia ooʼulaka nnojoluinjatüin jiwaʼatüin paaʼin, wuleerü pukuwaʼipa suulia tü alawaa sunoujakat anain wayuu ooʼulaka tü kasa amojujakat wakuwaʼipa. Paashajaale nümaa naapeerü pünüiki. Jimateerü paaʼin nutuma otta pütüjaweerü aaʼu tü paainjüinjatkat (Filipos 4:6, 7; Hebreokana 13:6). Nieechi Maleiwa akaaliinjaka pia wanaa sümaa sülatüin kasa mojusü pümüin (Hebreokana 4:16). Otta müsia, kateesü poʼu waneepia nutuma (Roma 6:23).

Pürütkaale nünainmüin Maleiwa, pürütkaa anainmüinchii na naʼaleewainkana. Na naʼaleewainkana Maleiwa paʼaleewainjeena. Meena aka naaʼin puwalayuu pümüin. Talateena sünain nekirajüin pia nüchiki Maleiwa, naya akaaliinjeenaka pia ooʼulaka natütüleʼereerü paaʼin.

Nnojoishii waya wanaawain nümaa Maleiwa. Aleeweere pia nümaa Maleiwa, kanainjatü paaʼin wanee kasa: aleewaa nümaa Maleiwa nnojotsü müin aka saaʼin aleewaa sümaa wayuu. Niakai watta maʼin saalii nuuyase woulia, atüjashaatashi ooʼulaka katchinshi maʼin. Nia neʼe niakai Aluwataainjachika waaʼu. Sutuma tia, aleeweere waya nümaa, jaa müinjana waya nümüin ooʼulaka waaʼinrüinjatü tü nuchuntakat. Aaʼinraa tü nümakat Maleiwa süpülajatü anain wakuwaʼipa (Santiago 1:25).