Süpüla naʼaleewain pia Maleiwa, piʼraajüinjachi nia. Na paʼaleewainkana neʼraajüin ooʼulaka neenajüin pia süka pünülia, ¿aashimüin? Müshia Maleiwa keeʼireesü naaʼin piʼraajüin ooʼulaka puunejüin nia süka nünülia. Jeowa nünülia Maleiwa (Salmo 83:18; Mateo 6:9). Pütüjaainjatü aaʼu tü anakat otta tü mojukat nümüin, jaraliin na naʼaleewainkana otta na nüʼünüükana. Süka choʼujaain watta saalii kaʼi süpüla weʼraajüin wanee wayuu, saashin tü Wiwüliakat anasü «akatalaa kaʼi» süpüla eʼraajaa Jeowa (Éfeso 5:15, 16, NM).

Na naʼaleewainkana Maleiwa naainjüin tü anakat nümüin. Kanain paaʼin na paʼaleewainkana. Maʼaka müliale naya putuma ooʼulaka paainjüle tü mojukat namüin, ¿ayateena paʼaleewain? Nnojo. Akaʼaya aleeweere pia nümaa Maleiwa paaʼinrüinjatü tü anakat nümüin (Juan 4:24).

Wainma iküleesia nnojotka akaaliinjüin wayuu süpüla naʼaleewain Maleiwa. Jesús, chi naʼaleewainkai maʼin Maleiwa, aashajaashi süchiki piamasü wopu. Wanee jerutsü eere wainmain wayuu suluʼu. Wopukot tüü sünainmüinsü tü ouktaakat. Tü wanee mouisü palitchon na wayuu oʼunakana suluʼu. Wopukot tia sünainmüinsü tü kataakat oʼuu waneepia. Makalaka, aleeweere pia nümaa Maleiwa, pütüjaainjatü aaʼu tü aʼwaajaa anakat nümüin (Mateo 7:13, 14)