Nnojotsü nuuʼulaainjatüin Jeowa sumojujain tü wayuu mojulaasükalüirua tü Paraiisükat. Na kepiainjanakana suluʼu nayainjana neʼe na naʼaleewainkana. ¿Kasa alateetka sümüin tü mojulaasükalüirua? Süpüla watüjaain saaʼu, wekirajaa nüchiki Noé. Sümaiwa paala yaajachi nia saaʼu tü mmakat. Wayuu anashi nia otta naainjeepuʼuin maʼin waneepia tü keeʼireekat naaʼin Jeowa. Jee na wanee wayuukana mojusü maʼin tü naainjakat. Makalaka nümüin Jeowa nümüin Noé tantireerü wanee juya miyoʼushaata süpüla tajaʼttirajatüin tü mojulaasükalüirua. Otta taasia nuluwataain nia sünain aainjaa wanee anua miyoʼu maʼin süpüla nnojoluinjachin ouktuin nia sümaa tü nüpüshikat (Génesis 6:9-18).

Naainjüin Noé tü anuakat sümaa tü nüpüshikat. Naapirüin Noé tü wayuukalüirua süchiki wanee Juya miyoʼushaata aʼitajatü, akatsaʼa nnojoishii eeka jaa namüin. Aainjüshii neʼe kasa mojusü waneepia. Kettaapa nutuma Noé tü anuakat nikerotirüin tü mürütkalüirua, süchikijee nikerotaka sümaa tü nüpüshikat. Shiasaʼa mapa nüntiraka Jeowa wanee juya miyoʼu. Aʼitüsü tü juyakat soʼu 40 kaʼi otta 40 ai, shiasaʼa pirataka wuin tü Mmakat (Génesis 7:7-12).

 Ouktushii na mojulaashiikana, akaisaʼa Noé sümaa nüpüshi katüsü noʼu. Naaʼinmajüin Jeowa naya süʼütpünaa tü Juya miyoʼushaatakat otta nuʼuniraka naya suluʼumüin wanee Mma eere nnojoluin kasa mojusü (Génesis 7:22, 23). Saashin tü Wiwüliakat, antajatü wanee kaʼi eere najaʼttirajanain Jeowa na nnojoliikana aainjeein kasa anasü. Nnojoleena ajaʼlajeʼennüin na wayuu aainjakana kasa anasü. Katüinjatü noʼu waneepia suluʼu tü Mma Paraiisüinjatkat (2 Pedro 2:5, 6, 9).

Wainma wayuu maaʼulu aainjüshii kasa mojusü. Wainma kasa mojusü suluʼu tü mmakat. Waneepiashi Jeowa sünain nuluwataain na Aküjüliikana pütchi süpüla naapirüin tü wayuukalüirua, akanasaʼa wainmain na nnojoliikana aapajeein nünüiki Jeowa. Nnojotsü naʼwanajaweein tü nakuwaʼipakat jee nnojotsü nacheküin nüküjüin Maleiwa namüin tü anakat otta tü mojukat. ¿Kaseerü alataka namüin? ¿Neeʼiranajaweetche nakuwaʼipa? Wainma na nnojoliikana süpüla naʼwanajeʼerüin nakuwaʼipa. Alüʼütsü tü kaʼikat ajaʼlajeʼennüinjatka oʼu tü wayuu mojulaasükat (Salmo 92:7).

Nnojotsü ajaʼttinnajatüin tü Mmakat, paraiisüinjatü. Na naʼaleewainkana Maleiwa katüinjatü noʼu waneepia suluʼu tü Paraiisükat yaaya saaʼu tü Mmakat (Salmo 37:29).