Eeshi süpüla piʼraajüin Jeowa paashajeʼerüle tü Wiwüliakat. Sümaiwa paala, nüneekajüin Maleiwa wanee wayuuinnua süpüla nashajüinjatüin tü nünüikikat. Sünülia tia nashajakat Wiwülia. Maaʼulu eeshi süpüla weʼraajüin Maleiwa waashajeʼerüle tü Wiwüliakat. Tü suluʼukat shia tü nünüikikat Jeowa, sutuma tia Nünüikimaajatü Maleiwa sümünaka. Eesü süpüla wanoujuin sünain tü sümakat tü Wiwüliakat süka matüjain aküjaa naʼalain Jeowa. «Matüjainsai nia aküjaa alawaa.» (Hebreokana 6:18.) Süka müin shia, tü Nünüikimaajatkat Maleiwa shia tü shiimainkat (Juan 17:17).

Tü Wiwüliakat shia wanee asülajuushi kojutusü maʼin naapajala wamüin Maleiwa. Müsü aka saaʼin wanee karaloukta nünüikimaajatü wanee ashii aipürai namüin nüchonnii. Aashajaasü süchiki tü nüküjakat Maleiwa, anainjatüin maʼin kepiaa saaʼu tü Mmakat, tü münakat shia wanee paraiisü. Süküjüin wamüin tü naainjakat Maleiwa sümaiwa paala, tü naainjakat maaʼulu ooʼulaka tü naainjüinjatkat mapeena namüin na nüchonnii jaa makana nümüin. Otta taasia sükaaliinjüin waya wanaa sümaa sülatüin kasa mojusü wamüin otta süpüla talatüinjanain waya (2 Timoteo 3:16, 17).

 Naʼaleewain Maleiwa na aküjüliikana pütchi nüchiki Jeowa, naya akaaliinjeenaka pia süpüla pütüjaain saaʼu tü sümakat tü Wiwüliakat. Püküjüinjatü müleʼe namüin pikirajaweein sünain tü Wiwüliakat. Nnojoleena achekajüin saaʼu nekirajüin pia (Mateo 10:8). Otta eein süpüla puʼunuin sünain tü outkajawaakat. Tüü, aainjünüsü suluʼu wanee aʼwaajülee kanüliasü Piichi outkajaalee. Maʼaka puʼunule sünain tü outkajawaakat, piʼraajeechi maʼin Maleiwa.

Eeshi süpüla piʼraajüin Maleiwa kanainre paaʼin tü kasa nukumajalakat. Saashin tü Wiwüliakat nia «Maleiwa [...] kakumalakai tü sirumakat sümaa süpüshuaʼa tü kasa eekat chaa iipünaa, tü mmakat sümaa tü kasa eekat süpaʼa». (Aluwataaushikana 4:24). Wanaa sümaa nukumajüin Jeowa «tü sirumatuʼukat», naainjüin chi Kaʼikai. ¿Kasa shikirajaka anain waya tüü? Katchin maʼin Jeowa. Nia müleʼe ountaka aainjüin wanee kasa eeka katchin maʼin maʼaka naaʼin chi Kaʼikai. Otta taasia shiiʼiyatüin wamüin atüjüin maʼin Jeowa, nnojorüle kasain nütüjaain aaʼu nnojoishijeʼe naainjüin chi Kaʼikai, aapaka wamüin nuturula ooʼulaka nuwarala, nnojoishi süpüla niokojooin.

Süka tü nukumajalakat Jeowa niiʼiyatüin alin waya nüpüla. Kanain paaʼin süpüshuaʼa tü naatawaikat süchon wunuʼu eeka saaʼu tü Mmakat. Eesüjee süpüla naapüin wamüin Jeowa waneesia süchon wunuʼu jee nnojorüle shia nutuma. Akatsaʼa, wainma süchon wunuʼu naapüin wamüin sümaa naatain seʼeje, sünoʼu, sajaʼapüin ooʼulaka sukuwaʼipa. Tüü, eeʼiyatüsü alin waya nüpüla Jeowa, asülajülin nia, kojutuin nümüin wayuu ooʼulaka anain maʼin nia (1 Corinto 10:26).