1, 2. ¿Kasa nüchekaka Jeʼwaa napüleerua na kaʼwayuuseshiikana otta nachonnii?

NIA Jeʼwaa keʼinaajalaka sukuwaʼipa kaʼwayuusee. Saashin tü Wiwüliakat nukumajala Jeʼwaa tü palajatkat jierü otta naapajala shia nümüin Adán. Anuu tü nümakat Adán süka talatashaatain naaʼin: «Mashaatakatche maʼi maa aka taaʼin. Shiipüsekat, shiaʼaya neʼe teipüse. Shiʼirukukat, shiaʼaya neʼe teʼiruku» (Génesis 2:22, 23). Shiaʼaya keeʼireeka naaʼin Jeʼwaa talatüinjanain na kaʼwayuuseshiikana.

² Wattapejeʼe maʼin naalii na wayuu nnojoliikana talatüin naaʼin sümaa naʼwayuuse otta nachonnii. Tü pütchi suluʼukat tü Wiwüliakat sükaaliijain na kaʼwayuuseshiikana, na kachonshiikana otta na tepichikana süpüla talatajiraain naaʼin otta anajiraain naya (Lucas 11:28).

3, 4. (1) ¿Kasa süküjaka tü Wiwüliakat namüin na tooloyuu kaʼwayuuseshiikana? (2) ¿Kasa anasü neʼreetka na kaʼwayuuseshiikana nalatirüle sooʼopünaa naaʼin tü mojukat natuma?

³ Kojutuinjatü otta alinjatü maʼin nuʼwayuuse nüpüla wanee wayuu saashin tü Wiwüliakat (paashajeʼera Éfeso 5:25-30). Chi wayuu eekai kaʼwayuusein aichoinjatü maʼin nüpüla nuʼwayuuse, naaʼinmajüinjatü shia, kapülainjatü shia naaʼin, nnojotsü airuʼuluinjatüin nünüiki sümüin otta nnojoluinjatü niʼyaatüin shia.

⁴ ¿Kasa naaʼinrajatka wanee wayuu mojule wanee kasa sutuma nuʼwayuuse? Müsü sünüiki tü Wiwüliakat namüin na kaʼwayuuseshiikana: «Anakaja müleka aire jüpüla juʼwayuuse waneʼewaʼire jukua sümaa nnojoliin jashichin jia namüin» (Colosas 3:19). Jiakana kaʼwayuuseshiikana, soto jaaʼin eein tü kasa mojukat jutuma. Süpüla motuin naaʼin Maleiwa tü mojukat jutuma, anasü motule jaaʼin tü mojukat sutuma juʼwayuuse (Mateo 6:12, 14, 15). Talateerü  naaʼin na kaʼwayuuseshiikana nalatirüle sooʼopünaa naaʼin tü mojukat natuma.

5. ¿Jamüsü kojutuinjatka nümüin wanee wayuu nuʼwayuuse?

⁵ Keeʼireesü naaʼin Jeʼwaa kojutuinjatüin nuʼwayuuse wanee wayuu nutuma. Jülüjainjatü maʼin naaʼin tü kasa choʼujaakat sümüin nuʼwayuuse, yootuinjachi nia sümaa otta kapülainjatü naaʼin tü sümakat. Nnojotsü ashaitaain tia, mojutule nuʼwayuuse wanee wayuu nutuma, eeshijaʼa nnojorüle naapajüin Jeʼwaa nünüiki nuʼuraajapa (1 Pedro 3:7, TNM). Nnojoishii nayain neʼe na tooloyuukana kojutuin nümüin Jeʼwaa noulia na jieyuukana, kojutushii nümüin napüshuaʼa na wayuu aikana apüla nia.

6. ¿Kasa naaʼinrajatka wanee wayuu süka saʼaniraain nukuwaʼipa sümaa nuʼwayuuse?

⁶ Nüküjain Jesuu saʼaniraain nukuwaʼipa wanee wayuu sümaa nuʼwayuuse (Mateo 19:6). Wanee wayuu eekai kaʼwayuusein nnojotsü kawalaʼatainjatüin tü nuʼwayuusekat nutuma. Akaʼaya tü jietkat, nnojotsü eeʼirataainjatüin nuulia chi suʼwayuusekai (Proverbios 5:15-21; Hebreokana 13:4). Chi wayuu kaʼwayuusekai anashi «nnojoire niyouktüin ainkawaa sümaa tü nuʼwayuusekat, jaʼitakaje tü jietkat nümaa chi suʼwayuusekai» (1 Corinto 7:3-5). Jülüjainjatü naaʼin na tooloyuu kaʼwayuusekana pütchikat tüü: «Wane wayuu, nnojotsü kanain naaʼin niʼiruku, shia eeka naaʼinmajüin shia». Kamalainsü maʼin sümüin wanee jierü aichonle maʼin shia nüpüla chi suʼwayuusekai otta kamaneere nia sümüin (Éfeso 5:28-30).

7. ¿Kasa anasü eeka sünainjee niain laülaain chi toolokoi saaʼu nuʼwayuuse otta nüchonnii?

⁷ Müsü sünüiki tü Wiwüliakat suluʼu 1 Corinto 11:3: «Chi laülaashikai saaʼu wane jierü, nia chi suʼwayuusekai. Je chi laülaakai naaʼu chi suʼwayuusekai, nia Cristo. Ooʼulaka chi laülaakai naaʼu Cristo, nia Maleiwa». Laülaainjachi chi toolokoi saaʼu nuʼwayuuse otta nüchonnii süpüla anainjatüin nakuwaʼipa.

8. ¿Kasa saaʼinraka wanee wayuu kojutule sutuma chi suʼwayuusekai?

⁸ Mayaainjeʼe eein süpüla mojukuwaʼipalüin wanee kasa nutuma wanee wayuu eekai kaʼwayuusein, aneerü maʼin sukuwaʼipa nüpüshi  müleka kojutule nia sutuma tü nuʼwayuusekat otta anale sümüin niain oʼunirüin nakuwaʼipa (1 Pedro 3:1-6). Anuu tü sümakat tü Wiwüliakat: «Jiakana jieyuu kaʼwayuusekana, kojutuinjachi jümüin juʼwayuuse» (Éfeso 5:33). Jaʼitaichi manoujain suʼwayuuse wanee wawala ayatüinjachia kojutuin nia sümüin. Müsü sünüiki tü Wiwüliakat: «Jia jieyuukana kaʼwayuuseshiikana, anashii müleka jüüjüüle jia waneʼewaʼire jukua namüin juʼwayuuse. Mayaashiije naya ayouktüin nünüiki Maleiwa, eesü süpüla jimeʼejüin naaʼin sümaa nnojolüin jüʼülüjaain namaa, süka jaaʼinrüin kasa anasü waneepia noʼupala. Eesü süpüla kapülain naaʼin nünüiki Maleiwa müleka nayaawatüle saaʼu sünain kojutüin nia jütüma waneepia» (1 Pedro 3:1, 2). Eesü süpüla kapülain naaʼin wanee wayuu tü sunoujakalü anain tü nuʼwayuusekat anale maʼin sukuwaʼipa nüpüleerua.

9. (1) ¿Kasa eeka süpüla saaʼinrüin wanee wayuu nnojorüle anain sümüin wanee kasa nüneeküinjatka chi suʼwayuusekai? (2) ¿Jamüsü sünüiki Tito 2:3-5 namüin na jieyuu kaʼwayuusekana?

⁹ ¿Kasa eeka süpüla saaʼinrüin wanee wayuu nnojorüle anain sümüin wanee kasa nüneeküinjatka chi suʼwayuusekai napüleerua? Eesü süpüla süküjain nümüin tü jülüjakat saaʼin sümaa kojutuin nia sümüin. Jamüsüjaʼa Sara süküjain wanee kasa mojushiika nümüin Abraham, anuupejeʼe tü nümakat Jeʼwaa nümüin: «Paaʼinra tü sümakat Sara pümüin» (Génesis 21:9-12). Wanee wayuu eekai  kaʼwayuusein sükaaliijainjachin chi suʼwayuusekai sünain tü kasa naaʼinrajatkat, aluʼuinjaʼa shiale wanee kasa nnojotka pansaain sümaa tü sümakat tü Wiwüliakat (Aluwataaushikana [Hechos] 5:29; Éfeso 5:23, 24). Wanee wayuu eekai kaʼwayuusein tütüinjatü shipialuʼu, saaʼinmajüinjana süchonnii otta sükaaliijainjachi suʼwayuuse (paashajeʼera Tito 2:3-5). Kojuteerü otta aijeerü maʼin shia nüpüla chi suʼwayuusekai otta napüla na süchonniikana neʼrüle shia sünain shiʼyataain maʼin namaa (Proverbios 31:10, 28).

10. ¿Jamüsü sünüiki tü Wiwüliakat süchiki nakatajiraain otta nooʼulaajiraain na kaʼwayuuseshiikana?

¹⁰ Eeshii na wayuu ooʼulaajiraamaatakana suulia kaʼwayuusee jee akatajiraakana kasale alatüin namüin. Müsü tü Wiwüliakat namüin na jieyuu kaʼwayuusekana: «Nnojo jükatalaain nuulia juʼwayuuse» otta müsü namüin na tooloyuu kaʼwayuusekana: «Nnojo juuʼulaain suulia juʼwayuuse» (1 Corinto 7:10, 11). Eesü tü kasa eekat süpüla nakatajiraain anainjee na kaʼwayuuseshiikana. Jülüjainjatpejeʼe maʼin naaʼin tü naneeküinjatkat. * ¿Kasa eeka süpüla nooʼulaajiraain anainjee na kaʼwayuuseshiikana? Saashin tü Wiwüliakat, waneesia neʼe tü kasa eekat süpüla nooʼulaajiraain anainjee na kaʼwayuuseshiikana. Shia müleka sümaʼüjiraale sukuwaʼipa wanee jierü nümaa wanee toolo nnojoikai suʼwayuusein jee niale chi toolokoi amaʼüjiraain sümaa wanee jierü nnojotkat nuʼwayuusein (Mateo 19:9).

11. ¿Kasa naaʼinmaainjatka na kachonshiikana?

¹¹ Jia kachonshiikana, anashii jülatirüle kaʼi namaa jüchonnii, choʼujaasü maʼin tia namüin. Aʼyataainjana maʼin jia süchiirua jikirajüin na jüchonniikana nüchiki Jeʼwaa (Deuteronomio 6:4-9).

12. ¿Kasa naaʼinrajatka na kachonshiikana süpüla naaʼinmajüinjanain nachonnii?

¹² Süka niain Satanaa aluwataain naaʼu na manoujainsaliikana kooʼomüinsü maʼin tü kasa mojusü alatakat maaʼutpünaa. Wainma wayuu mojulaasü aainjeeka kasa mojusü namüin na tepichikana.  Eeshii süpüla nataüjaanüin na tepichikana natuma naya wayuukana. Eesü kapüleere namüin noʼutku na kachonshiikana naashajaain süchiki tia namaa nachonnii. Püküja namüin na püchonniikana tü naaʼinrajatkat süpüla naaʼinmajüinjatüin nakuwaʼipa noulia na ataüjaaliikana tepichi. Jia kachonshiikana, jaaʼinmajüinjana na jüchonniikana (1 Pedro 5:8). *

13. ¿Jamüinjatü nachiaaya nachonnii natuma na kachonshiikana?

¹³ Na wayuu kachonshiikana nekirajüinjana nachonnii süpüla laülaainjatüin naaʼin. Puunteerü tia püchiaale püchonnii süka  anakalü akuwaʼipa. Nnojo müliain naya putuma wanaa sümaa püchiaain naya (Jeremías 30:11). Piʼyaatüinjanale naya, nnojo paaʼinrüin shia sümaa üttüin maʼin paaʼin. Nnojo airuʼuluin pünüiki namüin suulia müin pusotokai naaʼin «süka shiʼichi chajaruuta» (Proverbios 12:18). Püküja namüin tü kasa anasü eekat sünainjee kacheʼein naya sümüin tü münakat namüin (Éfeso 6:4; Hebreokana 12:9-11). (Paashajeʼera noota 29).

14, 15. ¿Jamüshii noonooinjanaka na tepichikana sümaa nanüiki nashi jee nei?

¹⁴ Oonooshi waneepia Jesuu nümaa chi Nüshikai, ayatüsia naaʼinrüin tia jaʼitairü kapüleein shia nümüin (Lucas 22:42; Juan 8:28, 29). Anasü maʼin nümüin Jeʼwaa noonoole na tepichikana sümaa nanüiki nashi jee nei (Éfeso 6:1-3).

¹⁵ Eesü kapüleere pümüin poonooin sümaa nünüiki püshi jee püi. Soto paaʼin talateechin maʼin Jeʼwaa putuma poonoole waneepia sümaa nünüiki püshi jee püi (Proverbios 1:8; 6:20; 23:22-25). *

16. (1) ¿Kasa naaʼinraka Satanaa süpüla naaʼinrüin kasa mojusü na tepichikana? (2) ¿Jamüshii nayainjanaka paʼaleewain na wayuu aikana apüla Jeʼwaa?

¹⁶ Keeʼireesü naaʼin Satanaa paaʼinrüinjatüin kasa mojusü. Eeshii süpüla niʼitaain na paʼaleewainkana otta waneirua tepichi süpüla nootuin pia sünain aaʼinraa kasa mojusü. Naaʼinrüin Satanaa tia süka nütüjaain aaʼu kapüleein namüin na tepichikana nachecherüinjatüin naaʼin napüleeruaanüle aaʼin. Jamüsüjaʼa Dina, wanee nüchon Jacob aleewajaasü shia namaa na manoujainsaliikana, sükajee tia, eʼrüsü shia kasa mojusü namaʼaleʼeya na süpüshikana (Génesis 34:1, 2). Nnojoire alin Jeʼwaa napüla na paʼaleewainkana, eeshii süpüla nachuntuin pümüin paaʼinrüin wanee kasa mojuka nümüin Jeʼwaa. Poonoole sümaa nanüiki, eʼreechi pia müliaa, mojeerü maʼin naaʼin na püpüshikana otta mojeerü naaʼin Jeʼwaa putuma (Proverbios 17: 21, 25). Naya anakana süpüla paʼaleewain na wayuu aikana apüla Jeʼwaa (1 Corinto 15:33, TNM).

17. ¿Kasa nuluwataaka anain Maleiwa na kaʼwayuuseshiikana, na kachonshiikana otta na tepichikana?

¹⁷ Noonoole na kaʼwayuuseshiikana otta na tepichikana sümaa tü nuluwataakalü anain Jeʼwaa, eʼreena naya kasa anasü. Piale wanee wayuu eekai kaʼwayuusein, anasü aichonle maʼin püpüla puʼwayuuse otta kamanee pia sümüin. Piale wanee jierü kaʼwayuuseka, kojuta putuma puʼwayuuse, pükaaliija nia sünain tü kasa nüneekakat otta püshata sukuwaʼipa tü jierü aküjünakalü achiki suluʼu Proverbios 31:10-31. Kachonle pia, pikiraja naya süpüla alinjachin Maleiwa napüla (Proverbios 22:6). Kaʼwayuusere jee kachonle pia, püchajaa sukuwaʼipa süpüla puʼunirüin naya süka anakalü akuwaʼipa (1 Timoteo 3:4, 5; 5:8). Otta jiakana tepichikana, joonoo sümaa nünüiki jüshi otta sünüiki jii (Colosas 3:20). Eejeerü tü kasa mojukat natuma na kaʼwayuuseshiikana, na kachonshiikana otta natuma na tepichikana. Nnojo yaletüin waaʼin otta «nnojotsü taaʼinjeein» müinjana waya mojule wanee kasa watuma. Aküjünüsü suluʼu tü Wiwüliakat tü naaʼinrajatkat na kaʼwayuuseshiikana, na kachonshiikana otta na tepichikana süpüla talatajiraain naaʼin.