1, 2. (1) ¿Kasa kojutuka atuma pümüin wanee asülajuushi? (2) ¿Kasa anasü weʼraka sutuma taashin waya nutuma Maleiwa?

¿ASÜLAJÜNÜICHE pümüin wanee kasa kojutuka maʼin pümüin? ¿Kasa kojutuka atuma wanee asülajuushi? Nnojotsü shiain sutuma wainmain nneerü sülia. Kojuteerü tia pümüin müleka talatüle paaʼin sutuma jee choʼujaale shia pümüin.

² Wainma tü kasa nüsülajakat wamüin Maleiwa. Eepejeʼe wanee alanaʼaleeka saʼakajee tü naapakat wamüin. Shia wanaa sümaa nuluwataain chi Nüchonkai süpüla taashinjanain waya suulia kaainjalaa. Süka taashin waya nutuma Maleiwa eesü süpüla katüin woʼu waneepia (paashajeʼera Mateo 20:28). Shiimain alin waya nüpüla Maleiwa süka nuluwataain Jesuu mmapaʼamüin. Sünain ekirajaayakat tüü, wainmeerü tü kasa watüjainjatkalü aaʼu süchiki tia.

3. ¿Jamakuwaʼipat outuin wayuu?

³ Nüjütüin Maleiwa chi Nüchonkai süpüla taashinjatüin wayuu suulia kaainjalaa jee outaa (Éfeso 1:7). Wekirajüle sünain tü naaʼinrakat Adán sümaa Eva suluʼu tü apainkat Edén, wayaawateerü aaʼu choʼujaashaatain maʼin taashin waya suulia kaainjalaa. Sükajee kaainjalain Adán sümaa Eva outushii naya sünainjee. Kaainjalasü jee outusü wayuu nünainjee Adán sümaa Eva. (Paashajeʼera noota 9).

4. ¿Jarai chi wayuu kanüliakai Adán otta jamapuʼusü nukuwaʼipa?

⁴ Nia Adán chi palajachikai wayuu nukumalakai Maleiwa.  Anasü maʼin nukumajia, anasü tü kasa jülüjakat naaʼin jee mamojulasai nia. Süka müin nukuwaʼipa, nnojolinjachi ayuulin jee outuin nia. Jeʼwaa nüshi Adán süka niain kakumalain nia (Lucas 3:38). Aashajaʼawaishi Maleiwa nümaa Adán otta nüküjawalin nümüin tü nüchekakat nüpüleerua. Jee anasü maʼin tü aʼyatawaa naapakat nümüin (Génesis 1:28-30; 2:16, 17).

5. ¿Jamüsü maka nukuwaʼipa Adán maʼaka nukuwaʼipa Maleiwa?

⁵ Akumajünüshi Adán nutuma Maleiwa sünain müin aka nukuwaʼipa (Génesis 1:27). Aipürai wayuu nia, kekiishi maʼin, lotusü nukuwaʼipa jee katchinshi nia. Jee müshia nia, akumajünüshi süpüla nüneeküin süka naaʼin nümüiwaʼa tü naaʼinrajatkat, nnojoishi müin aka saaʼin wanee maakina oʼunaka eepünaale suʼuninnüin. Eesü süpüla nüneeküin Adán naaʼinrüin tü anasükat jee tü mojusükat. Katüsüjeʼe noʼu waneepia suluʼu tü Paʼaraiisükat noonooleje sümaa nünüiki Jeʼwaa.

6. (1) ¿Kasa alataka nümüin Adán sutuma nnojoluin noonooin sümaa nünüiki Maleiwa? (2) ¿Kasa alataka wamüin sutuma tia?

⁶ Mojusü maʼin tü alatakat nümüin Adán sutuma nnojoluin noonooin sümaa nünüiki Maleiwa. Nnojoluichipa naʼaleewain nia Jeʼwaa otta outushi nia mapa. Mojuitpa nukuwaʼipa jee ajünajaanüshi nia suluʼujee tü apainkat (Génesis 3:17-19). Eʼrüshii waya wamüliala sutuma nnojoluin noonooin Adán sümaa nünüiki Maleiwa. «Sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Kaleʼeruʼushii waya kaainjalaa nünainjee Adán makalaka outuin waya, saashin tü Wiwüliakat süchepchiashii waya kaainjalaa (Roma 7:14). Nnojoluichipa süpüla katüin noʼu waneepia Adán sümaa Eva süka eʼrüliijaain wayumüin naya nümüin Maleiwa. ¿Jama wayakana? ¿Eeshiiche süpüla katüin woʼu waneepia? Aa. Eesü wanee kasa naaʼinraka Jeʼwaa süpüla taashinjanain waya suulia outaa.

7, 8. ¿Kasa wayu tü taashii münakat?

 ⁷ ¿Kasa wayu tü taashii münakat? Shia tü awalaajünakat süpüla nüjütünüin wanee wayuu eekai püreesain jee shiale süpüla süleʼejinnüin süchikuaʼa wanee kasa. Saashin tü Wiwüliakat shia tü awalaajünakat saaʼu wanee kasa eekai seewaain atumawaa otta wanaawainjatü sümaa sülia tü kasa eewaakat.

⁸ Kaainjalashi Adán jee outusü wayuu nünainjee, nnojoishi eein wanee wayuu eekai süpüla nuwalaajüin tü naainjalakat Adán. Akaisaʼa Jeʼwaa naapüin tü choʼujaakat süpüla taashinjanain waya suulia kaainjalaa jee outaa. Wekirajaa sünain kasapülajatüin tia otta jamüin anaka wakuwaʼipa sutuma.

9. ¿Kasa choʼujaaka süpüla taashinjatüin wayuu suulia kaainjalaa?

⁹ Süpüla taashinjatüin wayuu, aapajiraainjachi nikii wanee wayuu eekai lotuin nukuwaʼipa maʼakaapuʼu lotuin nukuwaʼipa Adán nnojoluiwaʼaya kaainjalain nia. Saashin tü Wiwüliakat, tü kasa awalaajünajatkat saaʼu wanee kasa eekai seewaain wanaawainjatü sümaa sülia tü kasa eewaakat (1 Timoteo 2:6). Müshijeseʼe choʼujaain wanee wayuu eekai maainjalain süpüla taashinjatüin wayuu süpüshuaʼa suulia saainjala, nnojotsü süpüla saaʼinrüin tia wayuu eekai eein süka kaleʼeruʼuin kaainjalain wayuu süpüshuaʼa (Salmo 49:7, 8).

10. ¿Kasa naaʼinraka Jeʼwaa süpüla taashinjatüin wayuu suulia kaainjalaa?

¹⁰ ¿Kasa naaʼinraka Jeʼwaa süpüla taashinjatüin wayuu suulia kaainjalaa? Nuluwataain chi Nüchon aishikai nüpüla mmapaʼamüin (1 Juan 4:9, 10). Nüpütüin Jesuu chi Nüshikai otta süpüshuaʼa tü kasa chakalü iipünaa süpüla nüntüinjachin mmapaʼamüin (Filipos 2:7). Süpüla wayuuinjachin  Jesuu, nukumajeʼerüin nia Jeʼwaa süleʼeruʼu María. Müshijeseʼe maainjalain nia jee anain nukuwaʼipa (Lucas 1:35).

11. ¿Jamüsüche sukuwaʼipa süpüla taashin wayuu süpüshuaʼa nutuma waneeshia neʼe wayuu?

¹¹ Wekirajaaitpa anain niʼrüijaain wayumüin Adán nümüin Jeʼwaa, müshiijeseʼe outuin waya nünainjee. ¿Eesüche süpüla taashin wayuu süpüshuaʼa nutuma waneeshia neʼe wayuu? Aa (paashajeʼera Roma 5:19). Süka maainjalain Jesuu, eeshi süpüla naapajiraain nikii naaʼu na nuuʼuliwoʼukana Adán jee taashin naya nutuma suulia outaa (1 Corinto 15:21, 22, 45).

12. ¿Jamüshi müliaka maʼin atumawaa Jesuu?

¹² Süküjain tü Wiwüliakat tü aainjünakat nüka Jesuu süpülapünaa nuʼutunuin aaʼin. Aʼyaajünüshi jee akachennüshi nia sünain wanee wunuʼu. Eʼrüshi maʼin nümüliala Jesuu soʼu tia (Juan 19:1, 16-18, 30, TNM). ¿Jamüshi niʼraka maʼin müliaa Jesuu? Shia sutuma tü nümakat Satanaa, nnojoleechin waneepiain wanee wayuu nümaa Maleiwa sülatüle kasa mojusü nümüin naashin. Sükajee nukuwaʼipa Jesuu, watüjaa aaʼu eein süpüla waneepiain wanee wayuu nümaa Maleiwa, jaʼitaichi niʼrüin maʼin müliaa. ¡Talatakajasaʼa naaʼin Jeʼwaa nümaa chi Nüchonkai! (Proverbios 27:11). (Paashajeʼera noota 15).

13. ¿Jamüsü sukuwaʼipa süpüla suwalaajünüin saainjala wayuu?

¹³ ¿Jamüsü sukuwaʼipa süpüla suwalaajünüin saainjala wayuu? Soʼu juyakat 33, nuuʼulaain Jeʼwaa nuʼutunuin aaʼin Jesuu natuma na nüʼünüükana. Tia soʼujatü kaʼikat 14 kashika nisán (Hebreokana 10:10). Shiasaʼa apünüin kaʼi süchikijee tia, nüsoʼireʼerüin Jeʼwaa naaʼin Jesuu suluʼu meʼrujuin nia. Süpüla keraain nutuma tü aluwataanaka apüla nia, oʼunushi nümaʼanamüin chi Nüshikai (Hebreokana 9:24). Anasü nümüin Maleiwa naapajiraain nikii Jesuu saaʼu tü wayuukalüirua. Süka suwalaajuushitpain saainjala wayuu,  eeshii süpüla taashin waya suulia kaainjalaa jee outaa (paashajeʼera Roma 3:23, 24).

14, 15. ¿Kasa waaʼinrajatka süpüla sülatinnüin woulia waainjala?

¹⁴ Wainma kasa anasü weʼraka sünainjee taashin waya suulia waainjala. Wekirajaa sünain jamüin anaka wakuwaʼipa maaʼulu sünainjee otta jamüin aneetka wakuwaʼipa mapeena.

¹⁵ Alatinnüsü woulia waainjala. Kapüleesü waaʼinrüin waneepia tü kasa anasükat. Eesü waaʼinrüle kasa mojusü jee waküjale pütchi nnojotka anain. ¿Kasa waaʼinrajatka süpüla sülatinnüin woulia tü waainjalakat? Ayaawajaainjana waya suulia jee wachuntajatü maʼin nümüin Jeʼwaa nülatiraiwa shia woulia. Waaʼinrüle tia, nülatireerü woulia Jeʼwaa tü kasa mojusü waaʼinrakat (Colosas 1:13, 14; 1 Juan 1:8, 9).

16. ¿Kasa waaʼinrajatka süpüla anainjatüin waaʼin?

¹⁶ Anasü waaʼin sutuma waaʼinrüin tü kasa anasükat. Waaʼinrüle wanee kasa mojusü, mojusü waaʼin sutuma. Eesü jülüjale waaʼin nnojoluin kasain anain apüla waya jee yüülale waaʼin. Ayataʼaya eejiraain waya sümaa tia. Achuntajana waya nümüin Jeʼwaa süpüla motuin naaʼin tü waainjalakat, müle shia watuma, naapeerü wanüiki jee moteerü naaʼin tü waainjalakat (Hebreokana 9:13, 14). Anasü maʼin nümüin Jeʼwaa waküjale nümüin süchiki tü kasa mojusü alatakat wamüin jee tü kasa jookalü apüla waya (Hebreokana 4:14-16). Waaʼinrüle tia, aneerü waaʼin sutuma.

17. ¿Kasa anasü weʼreetka sutuma naapajiraain nikii Jesuu waaʼu?

¹⁷ Kateerü woʼu waneepia. «Tü saapakat wamüin tü kaainjalaakat shia tü outaakat. Aluʼusaʼa nünainjee chi Wasenyotsekai Jesuu naapüin Maleiwa wamüin kataa oʼuu» (Roma 6:23, TNM). Süka naapajiraain nikii Jesuu waaʼu, eesü süpüla katüin woʼu waneepia jee nnojoleena ayuulin  waya (Alateetkat Mapeena [Apocalipsis] 21:3, 4). ¿Kasa waaʼinrajatka süpüla weʼrüin shikeraajüin tia?

18. ¿Jamüsü watüjaaka saaʼu alin maʼin waya nüpüla Jeʼwaa?

¹⁸ Talatüsü maʼin waaʼin wanaa sümaa süsülajünüin wamüin wanee kasa anaka maʼin. Kojutuinjatü maʼin wamüin tü naaʼinrakat Jeʼwaa wapüleerua saaʼujee taashin waya nutuma suulia tü kaainjalaakat. Anuu tü sümakat Juan 3:16, TNM: «Süka alin maʼin nüpüla Maleiwa na wayuukana, naapüin nikii chi waneeshikai Nüchon». Aitaleʼeshiijaʼa maʼin waya nüpüla Jeʼwaa naapaka chi Nüchonkai waaʼu. Müshia Jesuu, aishii waya nüpüla, müshijeseʼe naapajiraain nikii waaʼu (Juan 15:13). Sutuma tü naaʼinrakat Jeʼwaa otta Jesuu wapüleerua, watüjaa aaʼu alin maʼin waya napüla waneʼewai wakua (Galacia 2:20, TNM).

19. ¿Kasa paaʼinrajatka süpüla paʼaleewain Jeʼwaa?

¹⁹ Süka pütüjaaitpain saaʼu alin maʼin waya nüpüla Jeʼwaa, ¿kasa paaʼinrajatka süpüla paʼaleewain nia? Piʼraajüinjatü nukuwaʼipa. Nnojoishi süpüla alinjachin wapüla wanee wayuu nnojoire weʼraajüin nia. Saashin Juan 17:3, eesü süpüla weʼraajüin nukuwaʼipa Jeʼwaa. Paaʼinrüle tia, aijeechi maʼin nia püpüla, paaʼinreerü tü nüchekakat otta aleeweechi pia nümaa. Ayata pikirajaain waneepia sünain tü Wiwüliakat süpüla piʼraajüin nukuwaʼipa Jeʼwaa (1 Juan 5:3).

20. ¿Kasa waaʼinrajatka wanoujale sünain taashin waya sükajee outuin Jesuu?

²⁰ Punouja sünain taashin pia nutuma Jesuu. Saashin tü Wiwüliakat «chi eekai niʼitaain naaʼin nünain chi Nüchonkai Maleiwa, kateerü noʼu waneepia» (Juan 3:36, TNM). Chi wayuu niʼitaakai naaʼin nünain Jesuu naaʼinrüin tü nikirajakalü anain (Juan 13:15). «Anoujashii waya nünain Jesuu», nnojoishii müinjanain neʼe waya. Jaʼyainjatü saaʼu tü waaʼinrakat wanoujain sünain taashin waya sükajee  outuin Jesuu waaʼu. Saashin Santiago 2:26, atüjaana aaʼu kanoulain waya sünainjee tü kasa waaʼinrakat.

21, 22. (1) ¿Jamüshii woutkajaainjanaka juyawai süpüla sotuin waaʼin outuin Jesuu? (2) ¿Kasa wekirajaajeetka anain sünain ekirajaaya 6 otta 7?

²¹ Puʼuna sünain tü Outkajawaakat eere Sotuin Waaʼin Outuin Jesuu. Wanee ai süpülapünaa outuin Jesuu, nüküjain namüin na nikirajüinkana sotuinjatüin naaʼin tü kaʼi outakalü oʼu nia. Waaʼinrüin tia wanaa sümaa woutkajaain juyawai sünain tü kanüliakat Ekawaa Aipaʼajatkat nutuma chi Senyotkai (1 Corinto 11:20; Mateo 26:26-28). Keeʼireesü naaʼin Jesuu sotuinjatüin waaʼin naapajiraain nikii waaʼu süpüla taashin waya suulia kaainjalaa. Müshi nia: «Süpülajatü jaaʼinrüin waneepia süpüla sotüinjachin jaaʼin taya» (paashajeʼera Lucas 22:19). Wanaa sümaa woʼunuin sünain tia outkajawaakat, kojutusü wamüin taashin waya suulia waainjala jee alin waya nüpüla Jeʼwaa otta Jesuu. (Paashajeʼera noota 16).

²² Nnojotsü eein wanee asülajuushi eekai müin aka saaʼin tü naaʼinrakat Jeʼwaa wapüleerua (2 Corinto 9:14, 15). Sünain ekirajaaya 6 otta 7, wekirajaajeerü anain jameerüin nakuwaʼipa na outushiikana saaʼu outuin Jesuu.