Piakai aküjaikai pütchi:

Jülüjataa paaʼin piale noʼutku na aluwataaushikana shaʼwataka eere tü wutaikat Olivos, eeʼiyataa müshijaʼa Jesús pümüin süpülapünaa nuʼunuin iipünaamüin, nümaka pümüin: «Katchinjeetpejeʼe jaaʼin süntapa jaaʼumüin tü nüpülainkat Maleiwa, jüküjeenakalaka pütchi tachiki sainküinpünaa Jerusalén, Judeapünaa, Samariapünaa otta sainküinpünaa mmakat» (Aluw. 1:8). ¿Jamüsüjeʼe paaʼin müle pukuwaʼipa?

Eesüjaʼa süpüla iseerüin püchiki saaʼin pümüin tü aküjaakat pütchi. Eepejeʼe süpüla püsakirüin paaʼin: «Palitchonpejeʼe waya, ¿jamüsüche süpüla waküjainjatüin pütchi sainküinpünaa tü mmakat?». Soto paaʼin tü nüküjakalü Jesús wanee ai süpülapünaa outuin nia: «Soto jaaʼin tü tamüitpakat jümüin, nnojoishi alanaʼaleein wanee achepchiee nuulia chi nülaamainkai. Mülialejeʼeya taya natuma, mülieenaʼaya jia natuma. Naaʼinrülejeʼeya tü tamakat namüin, naaʼinreeriaʼaya tü jümakat namüin. Naaʼinreerü jümüin süpüshuaʼa tia saaʼujee tekirajanain jia, jama nnojolin neʼraajüin chi Kajünalakai taya» (Juan 15:20, 21). Jülüjale paaʼin tia wetsiikulokalüirua eesüjaʼa süpüla püsakirüin paaʼin sünain tüü: «¿Kasa taaʼinrajatka süpüla taküjainjatüin pütchi waneepia jaʼitairü süpüleeruaanüin taaʼin jee süpülajünüle tü aküjaakat pütchi?».

Eesü wasakirawaire waaʼin sünain tia maaʼutpünaa süka waküjaliin pütchi nüchiki Jehová wattapünaa sümüin wayuu maʼleekalia (Mat. 28:19, 20). Süpüleeruaanüle waaʼin, ¿kasa waaʼinrajatka süpüla waküjainjanain pütchi?

Aküjünüsü suluʼu tü karaloʼutakat Aluwataaushikana süchiki nekeraajüin tü aküjaakat pütchi na aluwataaushikana otta müshia na wane nikirajüinkana Jesús süka nakaalinjain naya Jehová. Aainjünüsü karaloʼutaka tüü süpüla piyaawatüin saaʼu jamüin naaʼin na nikirajüinkana Jesús sutuma nawainmalaain maʼin na anoujashiikana sünainjee naküjain pütchi. Poneerü maʼin paaʼin sukuwaʼipa naʼyataain na nikirajüinkana Jesús süka wanaawain shia sümaa naʼyataain na aʼyataashiikana nümüin Maleiwa maaʼutpünaa. Nnojotsü shiain neʼe wanaawain nakuwaʼipa sünain aküjaa pütchi, müsia sukuwaʼipa suʼuniria naʼyataain. Piyaawatüle saaʼu tüü, akooʼomüinraajeerü maʼin punoula nünain Jehová süka niain oʼunirüin nakuwaʼipa na aʼyataashiikana nümüin.

Kasataalejeseʼe jikirajaain sünain tü karaloʼutakat Aluwataaushikana süpüla sükatsüinrüin junoula nünain Jehová jee sünain nükaalinjeenain jia sükajee tü nüpülainkat. Atütülaajeerü maʼin jaaʼin jikirajaale sünain tü karaloʼutakat Aluwataaushikana süpüla ayatüinjanain jia sünain aküjaa pütchi süchiki sukuwaʼipa Aluwatawaa nutuma Maleiwa jee jükaalinjain wayuu süpüla suʼttaainjatüin (Aluw. 28:23; 1 Tim. 4:16).