1, 2. ¿Kasa alataka soʼu süpülajünüin tü aküjaakat pütchi noulia na anoujashiikana?

 MÜLIASHII maʼin nutuma Saulo na anoujashiikana, müshiijeseʼe noʼunuin Jerusalénjee (Aluw. 8:3). Eeshiijaʼa eekai jülüjain aaʼin nooʼuleʼenneenain nutuma Saulo suulia aküjaa pütchi. Anapejeʼe maʼin tü kasa alataka namüin süchiki tü namülialakat, ¿kasa anasü eeka sünainjee noʼunuin na anoujashiikana Jerusalénjee?

² Na anoujashii aʼwalakajeʼennakana paala, aküjashii pütchi eepünaale nantüin (Aluw. 8:4). Na apüleeruakana naaʼin na anoujashiikana isasü nachiki nooʼuleʼerüin naya suulia aküjaa pütchi, wattakuatsü aküjünüin pütchi sünainjee tü naainjakat namüin na anoujashiikana. Müsia neʼe tü alatakat maaʼulu.

3. (1) ¿Jarai chi kanüliakai Felipe? (2) ¿Jamüsü nnojotka süküjünüin pütchi Samaria nüpülapünaa Felipe? (3) ¿Kasa nüküjatüjütkalia Jesús süchiki Samaria?

³ Eejaachi Felipe a naʼakajee na anoujashii aʼwalakajeʼennakana (Aluw. 8:4; paashajeʼera tü pütchikat « Felipe, chi wayuu eʼikajüikai tü pütchi anakat maʼin»). Oʼunushi nia Samariamüin suluʼumüin wanee pueulo nnojoyütkalia aküjünüin aluʼu pütchi süka müin nünüiki paala Jesús namüin na aluwataaushikana: «Miʼita jia suulia wanee pueulo eekai chain Samaria. Naya juʼunawalinjanakana amaʼanamüin na wayuu yaakana Israel, na makana aka saaʼin anneerü eekai amüloulin» (Mateo 10:5, 6). Nütüjaatüjülia aaʼu Jesús naapaainjatüin sümaa tü pütchikat na wayuu chejeʼewaliikana Samaria, müshijeseʼe nümüin süpülapünaa nuʼunuin sirumatuʼumüin: «Jüküjeenakalaka pütchi tachiki sainküinpünaa Jerusalén, Judeapünaa, Samariapünaa otta sainküinpünaa mmakat» (Aluw. 1:8).

4. (1) ¿Jamüsü naaʼin na samariajeʼewaliikana sutuma tü pütchi nüküjakat Felipe? (2) ¿Jamüsü jülüjaka naaʼin tü nümakat Felipe?

 ⁴ Niyaawata aaʼu Felipe choʼujaain süküjünüin tü pütchikat chaa Samaria (Juan 4:35). Anasü naaʼin na wayuukana sutuma tü pütchi nüküjakat. Nnojoishii anajiraain na judíokana namaa na samariajeʼewaliikana, naʼürülashii naya. Kamalainsü maʼin namüin na samariajeʼewaliikana tü pütchikat süka nayaawatüin saaʼu süpülajatüin wayuu süpüshuaʼa. Naata maʼin suulia tü nekirajakalü anain na fariseokana. Koʼusü nakuwaʼipa na fariseokana sümüin wayuu otta jülüjasü naaʼin sülanaʼaleein nakuwaʼipa suulia wayuu. Nnojotpejeʼe müin nukuwaʼipa Felipe, aküjashi maʼin nia pütchi namüin na samariajeʼewaliikana. Müsüjeseʼe jülüjain naaʼin napüshuaʼa na wayuukana tü nümakat Felipe (Aluw. 8:6).

5-7. ¿Kasa anasü nountaka na anoujashiikana mayaainjeʼe müliain naya atumawaa?

⁵ Ayatüshiʼiya aküjain pütchi na anoujashiikana maaʼulu maʼaka naaʼinrüin shia na namaiwajanakana. Eeshii na anoujashii oʼunakana suluʼumüin wane mma süka müliain naya atumawaa otta eeshii na püreesakana atumawaa. Aküjapejeʼe naya pütchi eere nantüin, sutumajee tia wainma na wayuu aapajakana tü pütchikat. Jamüsüjaʼa  soʼutpünaa tü kanüliakat Segunda Guerra Mundial, aküjashii pütchi na anoujashiikana nünain Jehová mayaainjeʼe suluʼuin naya campo de concentración Nazi. Anuu nünüiki wanee judío nachiki na Aküjaliikana pütchi: «Sutuma yalayalain naaʼin na Aküjaliikana pütchi tayaawata aaʼu nanoujain tü sümakat tü Bibliakat, tanoujaka mapa nünain Jehová».

⁶ Eeshii noʼutku na müliapuʼukana atumawaa na Aküjaliikana pütchi anoujaka mapa. Jamüshijaʼa chi wawalakai Franz Desch wanaa sümaa nülatinnüin suluʼumüin tü campo de concentración chakalü Gusen (Austria) nikirajüin wanee waaria napüshi na SS münakana. Nantiraaka mapa sünain wanee outkajawaa miyoʼu, aʼyanaajiraainnapa naya nümüin Jehová, talatakajasaʼa maʼin naaʼin sutuma tia.

⁷ Müsia neʼe nakuwaʼipa na anoujashii oʼunakana noumainpaʼajee sutuma süpüleeruaanüin naaʼin. Jamüsüjaʼa soʼunnaa tü juyakat 1970 na wawalayuu oʼunakana chejee Malaui sutuma müliain naya atumawaa aküjashii maʼin naya pütchi chaa Mozambique. Süpüleeruaanaka naaʼin na anoujashii chajanakana Mozambique, ayatapejeʼe naya aküjain pütchi. Nüküjain Francisco Coana tü alatakat soʼu tia: «Wainmatua wapüreesajinnüin saaʼujee waküjain pütchi. Sutuma wainmain na wayuu anoujakana sünain tü pütchikat, wayaawata aaʼu nükaalinjain waya Jehová maʼaka nükaalinjain na anoujashii namaiwajanakana».

8. ¿Jamüshii nawainmalaaka na wayuu aküjünakana amüin pütchi?

⁸ Nnojotsü shiain neʼe nawainmalaain anainjee na anoujashiikana müliain naya atumawaa. Eeshiʼiya na akolojookana noumainpaʼajee sutuma atkawaa jee alin shiiʼiree aʼyatawaa. Sutuma tia wainma na wayuu aküjünakana amüin pütchi jee ekirajaakana sünain tü Bibliakat. Süka naatayaa sümüin nanüikipala naya wayuukana choʼujaasü süküjünüin pütchi namüin suluʼu tü anüikii naashajaakalü aka. ¿Püchajaainche sukuwaʼipa süpüla püküjain pütchi sümüin wayuu naataka eʼirukuu, naataka anüikii jee sainküinjeejatka mmakat süpüshuaʼa? (Apoc. 7:9).

9. (1) ¿Jarai chi kanüliakai Simón? (2) ¿Jamüsü ponoko naaʼin tü naaʼinrakat Felipe?

⁹ Wainma kasa pülasü naaʼinraka Felipe chaa Samaria. Wainma na wayuu masaʼasaliikana anakana nutuma jee niyuʼluin yolujaa süleʼeruʼujee wayuu (Aluw. 8:6-8). Eeka wanee wayuu ponoko maʼin aaʼin tü kasa pülasü naaʼinrakat Felipe, Simón nünülia chia wayuukai. Wayuu  ouutshi nia otta kojutushi atumawaa. Müsüjeseʼe müin sünüiki wayuu nüchiki: «Eekajasaʼa wayuukai chii, nüpülainmaajachi Maleiwa». Süka niʼrüin Simón tü kasa pülasü naaʼinrakat Felipe niyaawata aaʼu sünainjeejatüin tü nüpülainkat Maleiwa, müshijeʼe nunoujain nünain Maleiwa (Aluw. 8:9-13). ¿Jamüshi nuʼttaka Simón sünain anoujaa?

10. (1) ¿Jamüshi nüjütünaka Pedro otta Juan Samariamüin? (2) ¿Kasa naaʼinreeka Simón wanaa sümaa niʼitaain Pedro otta Juan najapü naaʼu na anoujashiikana?

¹⁰ Naapapa na aluwataaushikana süchiki nakooʼomüinraain na anoujashiikana chaa Samaria, aluwataanüshi Pedro otta Juan. (Paashajeʼera tü pütchikat « Niyuʼluin Pedro ‹shiyaawein tü wopu chaʼwatkat eere nuluwataain Maleiwa›»). Nantapa chamüin neʼitaain najapü naaʼu na jekenakana anoujain. Süntaka tü nüpülainkat Maleiwa naaʼu waneʼewai nakua. b Ponusü maʼin naaʼin Simón tü kasa pülasü naaʼinrakat na aluwataaushikana. Nümaka namüin: «Anashii jaapüle pülaa tamüin, teʼitaajeetkalaka tajapü naaʼu na wayuukana, sünteetkalaka nüpülain Maleiwa naaʼu». Naapeeka nneerü namüin na aluwataaushikana süka niyaʼlajüinjatüin nüküjainruʼu tü kasa pülasü nümaʼanajeejatkat Maleiwa (Aluw. 8:14-19).

11. (1) ¿Jamüsü nünüiki Pedro nümüin Simón? (2) ¿Jamaka nünüiki Simón niʼipajee?

 ¹¹ Lotusü maʼin nünüiki Pedro nümüin Simón: «Anashi amülouire pia sümaʼaleeya tü pünneetsekat, jama paapeein nneerü saaʼu tü nüsülajalakat Maleiwa. Nnojoishisa eeinjachin pia apashii wamaa sünain aʼyatawaakat tüü, jama nnojoluin anain tü suluʼukat paaʼin noʼuluʼu Maleiwa». Jee müshi nia nümüin: «Shiaka anain aluʼu piyaawajaale suulia türa pümaʼülakat jee puchunta maʼin nümüin Jehová, kamaʼa nülatireerüle sooʼopünaa naaʼin türa kasa mojusü paaʼinreekalü amüin». Nnojoishiyaajeʼe mojulaain Simón, shia neʼe naaʼinraka tü kasa mojusü suchuntaakat naaʼin. «Juchunta maʼin nümüin Jehová tapüleerua süpüla nnojoluinjatüin sülatüin tamüin tü kasa jüküjaitpakalü achiki», müshijeseʼe nümüin (Aluw. 8:20-24).

12. ¿Jamüsü watüjaaka saaʼu keejiain namüin na anoujashii ekirajakana sünain alawaa tü nukuwaʼipakat Simón, chi ayaʼlajeekai tü kasa pülasü nümaʼanajeejatkat Maleiwa?

¹² Waya anoujashiikana maaʼulu yaa, eesü tü kasa watüjakat sünainjee nüchiaanüin Simón nutuma Pedro. Nnojotsü anain müleka wayaʼlajüle jee woikaale suluʼu tü outkajaaleekat. Nayapejeʼe aaʼinrüin tia na anoujashii ekirajakana sünain alawaa, jamüsüjaʼa suluʼu wanee karaloʼuta soʼujatka 1878 aküjünüsü nawalaajapuʼuin nneerü na papa münakana süpüla naneekünüinjanain. Eeshii na maapülinkana sünain aaʼinraa tia.

13. ¿Kasa nnojoluinjatka naaʼinrüin na anoujashiikana shiiʼiree saapünüin namüin aʼyatawaa suluʼu tü outkajaaleekat?

¹³ Na anoujashii shiimainkana nnojoishii oikaain jee ayaʼlajüin kasa suluʼu tü outkajaaleekat, nnojoishii asülajayaainjanain jee anayaainjatüin nanüiki namüin na laülaashiikana süpüla saapünüinjatüin aʼyatawaa namüin suluʼu tü outkajaaleekat. Eejüinjatü naaʼin na laülaashiikana suulia nayain kojutuin namüin na wawalayuu washinnuukana. Nnojoluinjatü yaletüin waaʼin, müinjana naya maʼaka naaʼin na tepichikana. Waʼatapaja niain Jehová aapüin wanee aʼyatawaa  wamüin sükajee tü nüpülainkat (Luc. 9:48). Nnojotsü yaletüinjatüin naaʼin na aʼyataashiikana nümüin Maleiwa (Prov. 25:27).

14, 15. (1) ¿Kasa niʼyataapuʼuka anain chi wayuu chejeʼewaikai Etiopía otta kasa naaʼinraka nüpüla Felipe? (2) ¿Jamüsü naaʼin sutuma tü nüküjaka Felipe nümüin? (3) ¿Woutiisashiche nia sooʼopünaa naaʼin? (Paashajeʼera tü nootakat).

¹⁴ Aluwataanüshi Felipe nutuma wanee aapiee nümaʼanajeejachi Jehová suluʼu tü wopu sejetkat Jerusalénjee, chaʼwatka Gazamüin. Eeshijaʼa nüsakirüle naaʼin Felipe jamüin nüjütünaka chamüin. Nüntaka nümaʼanamüin wanee wayuu chejeʼewai Etiopía, wayuu kojutushi nia atumawaa. Emetutsü nünüiki sünain aashajeʼeraa tü nüshajalakat Isaías (paashajeʼera tü pütchikat « Wayuu kojutushi atumawaa»). Arütkaashi Felipe nünain chia wayuukai, nia oʼuniraka nia Jehová sükajee tü nüpülainkat, «¿eesia piyaawatüin saaʼu türa paashajeʼerakat?» nümakalaka nümüin. Anuujeseʼe nünüiki chi wayuukai niʼipajee: «¿Jamakuwaʼipalüinjatü süpüla tayaawatüin saaʼu nnojoire wanee wayuu ekirajakai taya?» (Aluw. 8:26-31).

¹⁵ Nuchuntuinjeseʼe chi wayuukai nümüin Felipe naʼatoʼuinjachin nia suluʼu neʼejena. Anakajasaʼa maʼin tü naashajaakalü achiki. Nnojotsü niyaawatüin aaʼu chi wayuu chejeʼewaikai Etiopía jaralin chi anneerü nüküjakai achiki Isaías (Is. 53:1-12). Nüküjaka Felipe nümüin shikeraajüin tia pütchikat nünain Jesucristo. Niyaawataka saaʼu woutiisainjachin nia maʼaka naaʼin na wayuu woutiisakana soʼu tü juyakat 33 sünain tü miʼiraa kanüliakat Pentecostés. Chi wayuu chejeʼewaikai Etiopía ekerotushi naʼakamüin na judíokana sünain anoujaa. «Anuʼusa wüin, anainjaʼa woutiisale taya, ¿kasakaʼa ataʼülüin takuwaʼipa?», nümakalaka. Woutiisaka nia soʼuleʼeya kaʼikat  tia (paashajeʼera tü pütchikat « Woutiisaa shiroku wüin»). c Mapa, chakuwaishi Felipe Asdod sutuma tü nüpülainkat Jehová eere nüküjain tü pütchi anakat maʼin (Aluw. 8:32-40).

16, 17. ¿Kasa naaʼinraka na aapieekana süpüla nakaalinjain sünain aküjaa pütchi?

¹⁶ Waaʼinmaasü maʼin tü aküjaakat pütchi maʼaka naaʼinrüin shia Felipe. Kamalainre nümüin wanee wayuu tü pütchi waküjakat nnojotsü shiain sünainjee anain maʼin wanüiki. Aküjünüsü suluʼu tü Bibliakat nayain na aapieekana oʼunirüin sukuwaʼipa tü aküjaakat pütchi sümüin wayuu süpüshuaʼa sainküin mmakat (Apoc. 14:6). Tü naaʼinrakat na aapieekana shia tü nüküjatüjütkalia achiki Jesús soʼu naashajaain süchiki tü waüyeekat jee tü mojuuikat. Sülüʼütpa sükalia süpüla sajaʼttüin tü kasakalüirua. Naya na aapieekana na akotchojüliikana süchon tü aʼttieekat. Anuu sooʼomüin nünüiki Jesús nachiki: Nasünneʼerüinjatü «tü kaainjalakalü atuma wayuu otta na wayuu aainjakana kasa mojusü» (Mat. 13:37-41). Nakotchojeena na aapieekana na wayuu aluwataainjanakana nümaa Jesús jee müshia na wayuu wattakana naalii, na nüneekakana Jehová süpüla naʼakainjanain na aʼyataashiikana nümüin (Apoc. 7:9; Juan 6:44, 65; 10:16).

¹⁷ Eeshii wantüle nepialuʼumüin wayuu eekai noʼuraajüin nümüin  Maleiwa süpülapünaa wantüin. Jülüjataa waaʼin tü alatakat namüin piamashii wawalayuu aküjakana pütchi nümaa wanee jintüichon. Noʼunajanapa nepialuʼumüin na wawalayuukana nüküjeʼeraa nümaka pütchi chi jintüichonkai suluʼu wanee miichi. Arütkaashi chi jintüikai nümüiwaʼa jee nütaletaka tü timbrekat, sujuʼitaka wanee majayüt arütkaashiijeseʼe na wawalayuukana süpüla naashajaain sümaa, ponusü naaʼin tü süküjakat namüin. Süküjain suchuntuin kaalinwaa nümüin Maleiwa süpülapünaa nantüin, shiiʼiree suunejünüin süpüla shikirajünüin sünain tü Bibliakat. Nekirajaka shia na wawalayuukana.

18. ¿Jamüsü kojutuinjatka wamüin aküjaa pütchi?

¹⁸ Talatüsü maʼin waaʼin otta kojutusü maʼin wamüin waʼyanaajiraain sünain aküjaa pütchi namaa na aapieekana sainküinpünaa mmaka süpüshuaʼa. Ayataʼaya yalayalain waaʼin sünain aküjaa pütchi sümaa talatüin waaʼin sünain ekirajaa wayuu nüchiki Jesús (Aluw. 8:35).