Jamüshijaʼa Álex nnojotsü nütüjaain aaʼu kasain nunoujainjatüin anain. Shiapuʼu nunoujaka anain niain kakumajalain Maleiwa kasa süpüshuaʼa. Nüküjaka joo chi profesorkai nümüin shiimain maʼin naashin na cientiificokana tü evolucionkot. Shiasaʼa suulia «matüjüinsai pia», nümünüin amüin. «Shiimainrejeʼe shia naashin na cientiificokana, ¿kasakaʼa taʼalaajüinjanain anainjee naya?», maa müsü naaʼin.

Sülatüle pümüin tü alatakat nümüin Álex, ¿punoujeerü anain tü evolucionkot sükajee shiimain shia saashin karaloukta?

Eeshii wayuu anoujaka maʼin sünain tü evolucionkot otta eeshii na anoujakana sünain niain kakumajalain Maleiwa kasa süpüshuaʼa. Isapejeʼe nachiki naküjüin jamüin nanoujaka sünain tia.

• Eeshii na «nukumajala Maleiwa kasa süpüshuaʼa» makana, süka nekirajünüin sünain suluʼu tü iküleesiakat.

• Eeshii na anoujakana sünain tü evolucionkot süka nekirajünüin sünain suluʼu koleejiaa.

Anuu sünüiki Hebreokana 3:4, TNM: «Süpüla eeinjatüin wanee piichi, eeshi chi kakumalakai shia. Jee chi kakumalakai tü kasakalüirua süpüshuaʼa nia Maleiwa». ¿Jamüsü saaʼin pümüin sünüiki tü Wiwüliakat?

TÜ MÜNAKAT: Akumajaasü kasa süpüshuaʼa sutuma süsotooin wanee kasa Big Bang münüsü.

TÜ MÜNAKAT: Mürüt wayuu sümaiwa.

TÜ MÜNAKAT: Shiimain tü evolucionkot.

Anuu sünüiki Julia: «Jamüshijaʼa chale pia wünaʼapü warai müin, piirakaale sümüin wanee miichi akumajuushi süka taapüla. «Anakatche maʼin tü miichikat, akumajaakajasaʼa neʼe shia sümüiwaʼa sünainjee wunuʼulia eekai sujuttüin», nnojoishijeʼe müin pia. Müsü mojushiiyaakai saaʼin tia. ¿Jamaka wanoujainjanaka sünain eejaʼalaa sümüin kasa sümüiwaʼa?».

Anuu sünüiki Gwen: «Süsotoole wanee piichi eekai piratüin karaloukta, ¿ojuʼiteetche wanee diccionario yalejee?».

Piyaawatajatü aaʼu tü kasa paaʼinrajatkat saashin tü Wiwüliakat (Roma 12:1, TNM). Nnojoishi anoujainjachin neʼe pia sutuma tü pütchi yaakat wünaapünaa:

• TÜ ANAKAT SAAʼIN PÜMÜIN: «Eeshi eera chi kakumajalakai waya».

• TÜ NANOUJAKALÜ ANAIN NA WANEEINNUA: «Anoujashii nünain Maleiwa na tamaajanakana».

• TÜ ANOUJINNEEKALÜ ANAIN PIA: «‹Punouja nünain Maleiwa›, münüshi taya tepialuʼu».

Pansaainjatü putuma tü punoujakalü anain suulia punoujaʼalüin sünain tü namakat na waneeinnua.

Anuu sünüiki Teresa: «‹Shiimain eein chi Maleiwakai›, müsü taya wanaa sümaa tekirajünüin suluʼu koleejiaa süchiki tü kasa eekat wanain. Eesü tü kapülajatkat nutuma Maleiwa tü kasa wanainkat jaʼitasü joʼuuchoin shia. Eesü nnojorüle watüjaain aaʼu jamüin wakuwaʼipa waleʼeruʼu. ¡Anakatche maʼin tia!».

Anuu nünüiki Richard: «Teʼrüle wanee edificio, anua jee kemion, ‹¿jaraiche kakumajalakai shia?›, müshi taya. Watta saalii kasa sünainka wanee kemion. Atüjashi maʼin chi akumajakai shia süpüla anain shiʼitaaya tü kasa choʼujaakat sünain. Sukumajuushire tü kemionkot, eeshijaʼa mata chi kakumajalakai wayuu».

Anuu nünüiki Anthony: «Müsü alawaakai saaʼin tamüin tü evolucionkot süka tekirajaain maʼin sünain tü cienciakat. [...] Kanoulashaatainjachi wanee wayuu süpüla nunoujain sünain tü evolucionkot».

Nnojotsü wanaawain tü namakat na cientiificokana süchiki tü evolucionkot, mayaainjeʼe natüjain maʼin jee kakaliainnain naya sünain ekirajawaa süchiirua. ¿Jamakaʼa piainjachikaʼa anoujain sünain tia?