Anuu tü alatakat sümüin Sandra nümaa Pablo: Piamainna kashi naya amüraajiraain. Akanasaʼa müin kakaliainnakana maʼin naya saaʼin namüin. Aluwanaajiraashii mensaaje waneepia jee yootiraashii suluʼupünaa serulaat. Shiʼraajüin maʼin Sandra Pablo. Eepajaʼa wanee kasa keeʼireeka naaʼin Pablo.

Tü naaʼinrakat neʼe shia naapaain sajapü jee nutujiraain neʼe sümaa. Nnojotsü sumojujeʼereein sukuwaʼipa Sandra. Anapejeʼe saaʼin nümaa chi sümüraajüinkai. Kamalainsü maʼin sümüin nünüiki Pablo jee müliasü maʼin shia niiʼiree.

Müleka kettaale pükalia süpüla amüraajirawaa, ¿kasajeʼe paainjaka sülatüle pümüin tü alatakat sümüin Sandra?

Jamüshijaʼa püchiaanüle suulia amuttaa iipünaajee jee macheʼere pia suulia tia pütchikat, ¿kaseerü alataka pümüin? Alateerü kasa mojusü pümüin. Meeria tü alatakat pümüin macheʼere pia suulia tü pütchi achiajaanakalü oulia pia süchiki tü amaʼüjirawaakat akuwaʼipaa süpülapünaa kasaalüü (1 Tesalónica 4:3).

¿Kaseerü alataka pümüin macheʼere pia suulia tü pütchi achiajaanakalü oulia pia? «Juʼluwajiraale jukuaippa [...], shiimüin sünain kachajaaleerüin jiʼiruku sütüma», müsü tü Wiwüliakat (1 Corinto 6:18). ¿Kasa süküjeeka wamüin pütchikat tüü?

 Anuu süpüshi tü kasa mojusü alatakat namüin na jimaʼalii jee majayünnüü amaʼüjiraakana nakuwaʼipa süpülapünaa kasaalüü:

• MOJUSHAATASÜ NAAʼIN. Eeshii na jimaʼalii jee majayünnüü mojukana maʼin aaʼin sutuma namaʼüjiraain nakuwaʼipa süpülapünaa kasaalüü.

• ALIʼRAJIRAASHII. «Jaratkajasaʼa nüinkaain amaa tapülapünaa», eeshii na makana süchikijee namaʼüjiraain nakuwaʼipa.

• NNOJOISHII ACHEKÜNÜIN. Nnaʼaya majayüt achekaka wayuu eekai kojutüin nümüin shia jee nnojoishi sücheküin wayuu eekai nüinkaapünaweein neʼe sümaa. Nnaʼaya jimaʼalii nnojoliikana acheküin jieyuu eekai toolomaain paala.

• Sajaʼttia pütchika: Juʼluwajiraale jukuwaʼipa süpülapünaa kasaalüü, mojuteena jia sümüin wayuu (Roma 1:24). Nnojo jaaʼinrüin tia, ¡kojutashaatasü maʼin tü jukuwaʼipakat!

Püchechera paaʼin jee nnojo paainjiraain pukuwaʼipa süpülapünaa kasaalüü (1 Tesalónica 4:3). Paainjeerü tia kasaatpa pia. Nnojoleena aliʼrajiraain jia, nnojoleerü shapaain jee mojuin jaaʼin maʼaka naaʼin na amaʼüjiraakana nakuwaʼipa süpülapünaa kasaalüü (Proverbios 7:22, 23; 1 Corinto 7:3).

• Aire pia nüpüla wanee wayuu, nücheküinjatü anain pukuwaʼipa otta anain paaʼin.

• Airejeʼe pia nüpüla wanee wayuu, nnojotsü nuchuntüinjatüin pümüin wanee kasa mojeetka atuma pukuwaʼipa nümaa Maleiwa (Hebreokana 13:4).